എറണാകുളം: എറണാകുളം മുവാറ്റുപുഴയിൽ ഒരു മാസം മുൻപ് നടന്ന വിവാഹച്ചടങ്ങിൽ പങ്കെടുത്ത 150 പേർക്ക് മഞ്ഞപ്പിത്തം സ്ഥിതീകരിച്ചു.
മഞ്ഞപ്പിത്ത ബാധയെ തുടർന്ന് ആരോഗ്യവകുപ്പ് പ്രദേശത്ത് വ്യാപക പരിശോധന നടത്തി. വിവാഹത്തലേന്ന് നടന്ന ചടങ്ങിൽ ഭക്ഷണം തയ്യാറാക്കിയ കാറ്ററിംഗ് സർവീസിലെ വെള്ളത്തിൽ നിന്നുമാണ് മഞ്ഞപ്പിത്ത രോഗബാധ ഉണ്ടായതെന്നാണ് ആരോഗ്യവകുപ്പിന്റെ പ്രാഥമിക കണ്ടെത്തല്.
ആവോലി പഞ്ചായത്തിലെ നടുക്കരയില് നടന്ന മധുരം വെയ്പ്പ് ചടങ്ങില് പങ്കെടുത്ത ജനപ്രതിനിധികള് ഉള്പ്പടെയുള്ളവര്ക്കാണ് മഞ്ഞപ്പിത്തം ബാധിച്ചത്. അതേസമയം ആരോഗ്യ വകുപ്പിന്റെ പ്രാഥമിക കണ്ടെത്തലിനെ തുടർന്ന് മാറാടിയില് പ്രവര്ത്തിക്കുന്ന കാറ്ററിംഗ് സ്ഥാപനം അടച്ചുപൂട്ടാന് ആരോഗ്യവകുപ്പ് നിര്ദ്ദേശം നല്കിയിരിക്കുകയാണ്.
