കോട്ടയം: മദ്ധ്യകേരളത്തിലെ വിശുദ്ധ ബെനഡിക്റ്റിന്റെ നാമത്തിലുള്ള ഏക ദൈവാലയമായ പൂവത്തുങ്കൽ സെന്റ് ബെനഡിക്റ്റ് പള്ളിയിൽ തിരുനാൾ ആഘോഷങ്ങൾക്ക് ഇന്ന് തുടക്കമാകും. മണ്ണയ്ക്കനാട് ഹോളിക്രോസ് റോമൻ കത്തോലിക്കാ ദൈവാലയത്തിന്റെ ഭാഗമായ ഇവിടെ ജനുവരി 30 മുതൽ ഫെബ്രുവരി 8 വരെയാണ് തിരുനാൾ നടക്കുന്നത്. ഇന്ന് (വെള്ളിയാഴ്ച) വൈകുന്നേരം 6 മണിക്ക് ഇടവക വികാരി ഫാ. തോമസ് പഴവകാട്ടിൽ തിരുനാൾ കൊടിയേറ്റ് കർമ്മം നിർവഹിക്കും. തുടർന്നുള്ള ദിവസങ്ങളിൽ ഫെബ്രുവരി 5 വരെ ദിവസേന വൈകുന്നേരം 5.30-ന് ജപമാല, ദിവ്യബലി, നൊവേന എന്നിവ ഉണ്ടായിരിക്കും.
ഫെബ്രുവരി 6 വെള്ളിയാഴ്ച സീറോ മലബാർ റീത്തിൽ നടക്കുന്ന ദിവ്യബലിക്ക് ഫാ. എബി പാറെപറമ്പിൽ (T.O.R) മുഖ്യകാർമികത്വം വഹിക്കും. ശനിയാഴ്ച വൈകുന്നേരം 5 മണിക്ക് ജപമാലയും തുടർന്ന് ഫാ. പോൾ ഡെന്നി രാമച്ചംകുടി, ഫാ. ഫെലിക്സ് പുറത്തെപറമ്പിൽ എന്നിവരുടെ കാർമികത്വത്തിൽ ദിവ്യബലിയും നടക്കും. ഇതിനുശേഷം പൂവത്തുങ്കൽ ജംഗ്ഷനിലേക്ക് വിശ്വാസപ്രഘോഷണയാത്രയും പരിശുദ്ധ കുർബാനയുടെ ആശീർവാദവും ഉണ്ടായിരിക്കും.
പ്രധാന തിരുനാൾ ദിനമായ ഫെബ്രുവരി 8 ഞായറാഴ്ച രാവിലെ 10 മണിക്ക് ജപമാലയും 10.30-ന് ആഘോഷപൂർവ്വമായ തിരുനാൾ ദിവ്യബലിയും നടക്കും. ഇടവക വികാരി ഫാ. തോമസ് പഴവകാട്ടിൽ, ഫാ. ജോസ് പറപിള്ളിൽ (M S F S) എന്നിവർ മുഖ്യകാർമികത്വം വഹിക്കും. തുടർന്ന് നടക്കുന്ന വിശ്വാസപ്രഘോഷണയാത്ര, പരിശുദ്ധ കുർബാനയുടെ ആശീർവാദം, നേർച്ചസദ്യ, കൊടിയിറക്ക് എന്നിവയോടെ തിരുനാൾ ആഘോഷങ്ങൾ സമാപിക്കും.
