പാലക്കാട്: 2025 ഡിസംബർ മാസത്തിൽ ജില്ലയിലെ മികച്ച പോലീസ് സ്റ്റേഷനായി വടക്കഞ്ചേരി പോലീസ് സ്റ്റേഷൻ തെരഞ്ഞെടുക്കപ്പെട്ടു. മികച്ച സേവനനിലവാരവും കാര്യക്ഷമമായ ക്രമസമാധാന പരിപാലനവും ജനസൗഹൃദ സമീപനവും കണക്കിലെടുത്താണ് ഈ അംഗീകാരം ലഭിച്ചത്.ജില്ലാ പോലീസ് ആസ്ഥാനത്ത് സംഘടിപ്പിച്ച ചടങ്ങിൽ വടക്കഞ്ചേരി സ്റ്റേഷൻ ഹൗസ് ഓഫീസർ (എസ്എച്ച്ഒ) ശ്രീ ബെന്നി ജില്ലാ പോലീസ് മേധാവി അജിത് കുമാർ ഐപിഎസിൽ നിന്ന് പുരസ്കാരം ഏറ്റുവാങ്ങി.
ജില്ലയിലെ വിവിധ പോലീസ് സ്റ്റേഷനുകളുടെ പ്രവർത്തനങ്ങൾ വിലയിരുത്തിയ ശേഷമാണ് മികച്ച സ്റ്റേഷൻ തിരഞ്ഞെടുത്തത്.നിയമലംഘനങ്ങൾ നിയന്ത്രിക്കുന്നതിലും കുറ്റകൃത്യങ്ങൾ തടയുന്നതിലും പൊതുജനങ്ങളുടെ പരാതികൾ സമയബന്ധിതമായി പരിഹരിക്കുന്നതിലും വടക്കഞ്ചേരി പോലീസ് സ്റ്റേഷൻ കൈവരിച്ച നേട്ടങ്ങൾ ജില്ലാ പോലീസ് നേതൃത്വത്തിന്റെ പ്രശംസ നേടി. ജനങ്ങളുമായി സൗഹൃദപരമായ ഇടപെടലുകൾ നടത്തിയും സമൂഹ സുരക്ഷ ഉറപ്പുവരുത്തിയും നടത്തിയ പ്രവർത്തനങ്ങളാണ് സ്റ്റേഷനെ ഈ നേട്ടത്തിലേക്ക് നയിച്ചത്.
സ്റ്റേഷനിലെ മുഴുവൻ പോലീസ് ഉദ്യോഗസ്ഥരുടെയും കൂട്ടായ പരിശ്രമമാണ് ഈ അംഗീകാരത്തിന് പിന്നിലെന്ന് ജില്ലാ പോലീസ് അധികൃതർ അറിയിച്ചു. വടക്കഞ്ചേരി പോലീസ് സ്റ്റേഷന്റെ ഈ നേട്ടം ജില്ലയിലെ മറ്റു സ്റ്റേഷനുകൾക്കും മാതൃകയാകുന്നതാണെന്നും അവർ പറഞ്ഞു.
