തൃശൂരിന്റെ രാഷ്ട്രീയ മണ്ണ് എപ്പോഴും ഒരു പൂരപ്പറമ്പ് പോലെയാണ്. പ്രവചനാതീതവും ആവേശഭരിതവും. ഇടതുപക്ഷത്തിന് അതിശക്തമായ വേരോട്ടമുള്ള, പ്രത്യേകിച്ച് സി.പി.ഐക്ക് കേരളത്തിൽ ഏറ്റവും കൂടുതൽ എം.എൽ.എമാരുള്ള ജില്ല എന്ന ഖ്യാതി തൃശൂരിനുണ്ടെങ്കിലും സമീപകാലത്തെ രാഷ്ട്രീയ സംഭവവികാസങ്ങൾ ഈ ചുവപ്പുകോട്ടകളിൽ വിള്ളലുകൾ വീഴ്ത്തിയിട്ടുണ്ടോ എന്ന ചോദ്യമാണ് ഇപ്പോൾ ഉയരുന്നത്.
ബിജെപിക്ക് കേരളത്തിൽ നിന്ന് ആദ്യമായി ഒരു ലോക്സഭാ അംഗത്തെ സമ്മാനിച്ച ജില്ല എന്ന നിലയിൽ തൃശൂർ ഇപ്പോൾ ദേശീയതലത്തിൽ തന്നെ ശ്രദ്ധിക്കപ്പെടുന്ന ഒരു രാഷ്ട്രീയ കേന്ദ്രമായി മാറിയിരിക്കുന്നു. 2021-ലെ നിയമസഭാ തിരഞ്ഞെടുപ്പിൽ ജില്ലയിലെ 13 മണ്ഡലങ്ങളിൽ 12 എണ്ണവും എൽ.ഡി.എഫ് തൂത്തുവാരിയ കാഴ്ചയാണ് കണ്ടതെങ്കിലും, അതിനുശേഷം വന്ന ലോക്സഭാ തിരഞ്ഞെടുപ്പും തദ്ദേശ ഭരണ തിരഞ്ഞെടുപ്പും നൽകുന്ന സൂചനകൾ വരാനിരിക്കുന്ന നിയമസഭാ പോരാട്ടം അത്ര എളുപ്പമാകില്ല എന്നാണ് വ്യക്തമാക്കുന്നത്.
ജില്ലയിലെ രാഷ്ട്രീയത്തെ വലിയ തോതിൽ സ്വാധീനിച്ച ഒന്നാണ് കരുവന്നൂർ ബാങ്ക് തട്ടിപ്പ് ഉൾപ്പെടെയുള്ള സഹരണ മേഖലയിലെ വിവാദങ്ങൾ. സാധാരണക്കാരായ വോട്ടർമാർക്കിടയിൽ ഈ വിഷയം ഉണ്ടാക്കിയ ആഘാതം ചെറുതല്ല. സഹകരണ പ്രസ്ഥാനങ്ങൾക്ക് വലിയ വേരോട്ടമുള്ള തൃശൂരിൽ ഇത്തരം അഴിമതി ആരോപണങ്ങൾ ഭരണവിരുദ്ധ വികാരമായി മാറുമോ എന്നതാണ് ഇടതുപക്ഷം ഭയക്കുന്നത്. ഇതിനുപുറമെയാണ് കെ. കരുണാകരന്റെ മകൾ പത്മജ വേണുഗോപാലിന്റെ ബി.ജെ.പി പ്രവേശനവും നാട്ടികയിലെ മുൻ എൽ.ഡി.എഫ് എം.എൽ.എ ആയിരുന്ന സി.സി. മുകുന്ദന്റെ മറുകണ്ടം ചാടലും.
കഴിഞ്ഞ നിയമസഭാ തിരഞ്ഞെടുപ്പിൽ എൽ.ഡി.എഫ് പ്രതിനിധിയായി ജയിച്ച സി.സി. മുകുന്ദന് ഇത്തവണ സീറ്റ് നിഷേധിക്കപ്പെട്ടതോടെയാണ് അദ്ദേഹം എൻ.ഡി.എ പാളയത്തിലെത്തിയത്. സി.പി.ഐയുടെ ഉറച്ച കോട്ടയായ നാട്ടികയിൽ ഇത്തവണ എൻ.ഡി.എ സ്ഥാനാർത്ഥിയായി മുകുന്ദൻ എത്തുമ്പോൾ അത് ഇടതുപക്ഷത്തിന് വലിയൊരു തലവേദനയാണ് സൃഷ്ടിക്കുന്നത്. മണ്ഡലത്തിലെ വോട്ടർമാർക്കിടയിലുള്ള അദ്ദേഹത്തിന്റെ സ്വാധീനവും പരിചിതത്വവും എൻ.ഡി.എക്ക് അനുകൂലമായി മാറുമോ എന്നതാണ് രാഷ്ട്രീയ നിരീക്ഷകർ ഉറ്റുനോക്കുന്നത്.
ജില്ലയിലെ പ്രധാന മണ്ഡലങ്ങളിലെ പോരാട്ട ചിത്രങ്ങൾ പരിശോധിച്ചാൽ ഓരോ ഇടത്തും പ്രമുഖരുടെ സാന്നിധ്യം കാണാം. തൃശൂർ നഗരമണ്ഡലം തന്നെയാണ് ഇതിൽ ഏറ്റവും ശ്രദ്ധേയം. എൽ.ഡി.എഫിനായി സാംസ്കാരിക മേഖലയിലെ കരുത്തനായ ആലങ്കോട് ലീലാക്കൃഷ്ണൻ എത്തുമ്പോൾ യു.ഡി.എഫ് തങ്ങളുടെ ശക്തനായ നേതാവ് രാജൻ ജി. പല്ലനെയാണ് അണിനിരത്തുന്നത്. എന്നാൽ എൻ.ഡി.എ സ്ഥാനാർത്ഥിയായി പത്മജ വേണുഗോപാൽ എത്തുന്നതോടെ ഇവിടെ പോരാട്ടം പ്രവചനാതീതമായി മാറുന്നു. മണലൂർ മണ്ഡലത്തിൽ മുൻ വിദ്യാഭ്യാസ മന്ത്രിയും ജനപ്രിയനുമായ പ്രൊഫ. സി. രവീന്ദ്രനാഥും കോൺഗ്രസിന്റെ മുതിർന്ന നേതാവ് ടി.എൻ. പ്രതാപനും തമ്മിലുള്ള മത്സരം കേരളം ഉറ്റുനോക്കുന്ന ഒന്നാണ്. അധ്യാപകനായ രവീന്ദ്രനാഥിന്റെ വ്യക്തിപ്രഭാവവും പ്രതാപന്റെ സംഘടനാ കരുത്തും തമ്മിലുള്ള പോരാട്ടം മണലൂരിനെ ഒരു ഗ്ലാമർ മണ്ഡലമാക്കി മാറ്റിയിരിക്കുന്നു. കുന്നംകുളത്ത് മുൻ മന്ത്രി എ.സി. മൊയ്തീനെതിരെ യു.ഡി.എഫിന്റെ അജയ് മോഹനും എൻ.ഡി.എയുടെ കെ.ആർ. റിജിലും നടത്തുന്ന പോരാട്ടം വിവാദങ്ങളുടെ നിഴലിലാണ്. മൊയ്തീനെതിരെയുള്ള കേന്ദ്ര ഏജൻസികളുടെ അന്വേഷണം ഇവിടെ പ്രധാന പ്രചാരണ ആയുധമാണ്.
ഗുരുവായൂർ മണ്ഡലത്തിൽ എൻ.കെ. അക്ബറും മുസ്ലിം ലീഗിന്റെ സി.എച്ച്. റഷീദും തമ്മിലുള്ള പോരാട്ടം ശക്തമാണ്. അഡ്വ. ബി. ഗോപാലകൃഷ്ണനിലൂടെ എൻ.ഡി.എ ഇവിടെ വലിയൊരു മുന്നേറ്റം ലക്ഷ്യമിടുന്നു. വടക്കാഞ്ചേരിയിൽ ലൈഫ് മിഷൻ വിവാദങ്ങളുടെ പശ്ചാത്തലത്തിൽ സേവ്യർ ചിറ്റിലപ്പള്ളിക്ക് വോട്ടുറപ്പിക്കുക എന്നത് വലിയൊരു വെല്ലുവിളിയാണ്. വൈശാഖ് നാരായണസ്വാമിയും ടി.എസ്. ഉല്ലാസ് ബാബുവും ഇവിടെ കടുത്ത മത്സരം കാഴ്ചവെക്കുന്നു. ഒല്ലൂരിൽ റവന്യൂ മന്ത്രി കെ. രാജൻ തന്റെ ഭരണനേട്ടങ്ങൾ ഉയർത്തിക്കാട്ടി ജനവിധി തേടുമ്പോൾ ഷാജി ജെ. കോടങ്കണ്ടത്തും ബിജോയ് തോമസും അട്ടിമറി പ്രതീക്ഷിക്കുന്നു.
ഇരിങ്ങാലക്കുടയിൽ ഉന്നതവിദ്യാഭ്യാസ മന്ത്രി ഡോ. ആർ. ബിന്ദുവും പരിചയസമ്പന്നനായ അഡ്വ. തോമസ് ഉണ്ണിയാടനും തമ്മിലുള്ള പോരാട്ടം ഇഞ്ചോടിഞ്ച് ആണ്. സന്തോഷ് ചേറക്കുളമാണ് ഇവിടെ എൻ.ഡി.എ സ്ഥാനാർത്ഥി. ജില്ലയിലെ രണ്ട് പട്ടികജാതി സംവരണ മണ്ഡലങ്ങളിലൊന്നായ ചേലക്കരയിൽ യു.ആർ. പ്രദീപ് നിലനിൽപ്പിനായുള്ള പോരാട്ടത്തിലാണ്. മുസ്ലിം ലീഗിന്റെ ശിവൻ വീട്ടിക്കുന്നും എൻ.ഡി.എയുടെ കെ. ബാലകൃഷ്ണനും ഇവിടെ ശക്തമായ സാന്നിധ്യമാണ്. നാട്ടികയിലെ പോരാട്ടം ഇത്തവണ വ്യക്തിപരമായ പകപോക്കലിന്റെയും രാഷ്ട്രീയ പരീക്ഷണത്തിന്റെയും വേദിയാണ്. ഗീത ഗോപിയും സുനിൽ ലാലൂരും നേർക്കുനേർ വരുമ്പോൾ, സി.സി. മുകുന്ദന്റെ സാന്നിധ്യം ഇവിടെ അപ്രതീക്ഷിത ഫലങ്ങൾ ഉണ്ടാക്കിയേക്കാം.
കൈപ്പമംഗലത്ത് കെ.കെ. വത്സരാജും ടി.എം. നാസറും അതുല്യ ഘോഷ്കുമാറും തമ്മിലാണ് മത്സരം. കൊടുങ്ങല്ലൂരിൽ വി.ആർ. സുനിൽകുമാറും ഒ.ജെ. ജനീഷും ഡോ. വർഗീസ് ജോർജും മാറ്റുരയ്ക്കുന്നു. പുതുക്കാട് മണ്ഡലത്തിൽ കെ.കെ. രാമചന്ദ്രനും കെ.എം. ബാബുരാജും എ. നഗേഷും തമ്മിലുള്ള പോരാട്ടം ചുവപ്പുകോട്ടയിലെ വിള്ളലുകൾ അളക്കുന്ന ഒന്നായിരിക്കും. ചാലക്കുടിയിൽ ബിജു ചിറയത്തും നിലവിലെ എം.എൽ.എ സനീഷ് കുമാർ ജോസഫും ചാർലി പോളും തമ്മിലുള്ള പോരാട്ടം വടക്കൻ തൃശൂരിലെ രാഷ്ട്രീയ മനസ്സ് വ്യക്തമാക്കും. ജില്ലയിലെ ഓരോ മണ്ഡലത്തിലും എൻ.ഡി.എ സ്ഥാനാർത്ഥികൾ പിടിക്കുന്ന വോട്ടുകൾ ആരുടെ വിജയത്തെയാണ് ബാധിക്കുക എന്നത് വലിയൊരു ചോദ്യചിഹ്നമാണ്. മുൻപ് ഇടതുപക്ഷത്തിനൊപ്പം നിന്ന പല വോട്ടുകളും ഇപ്പോൾ എൻ.ഡി.എയിലേക്ക് മറിയുന്നുണ്ടോ എന്നത് രാഷ്ട്രീയ നിരീക്ഷകർ ഉറ്റുനോക്കുന്ന കാര്യമാണ്. തൃശൂരിലെ ജനങ്ങൾ വികസനത്തേക്കാൾ ഉപരിയായി രാഷ്ട്രീയ വിവാദങ്ങൾക്കും വ്യക്തിപരമായ വിശ്വാസ്യതയ്ക്കും മുൻഗണന നൽകുന്നവരാണ്. കരുവന്നൂർ ബാങ്ക് തട്ടിപ്പ് കേസിൽ പ്രതിസ്ഥാനത്ത് നിൽക്കുന്ന സി.പി.എം നേതാക്കൾക്ക് ജനവിധി അനുകൂലമാകുമോ എന്നത് കണ്ടറിയണം.
