മലയാളിയുടെ ഭക്ഷണസംസ്കാരത്തിൽ പണ്ടുമുതലേ ഉലുവയ്ക്ക് വലിയ സ്ഥാനമുണ്ട്. ചെറിയ കയ്പുണ്ടെങ്കിലും ഔഷധഗുണങ്ങളുടെ കാര്യത്തിൽ ഉലുവയെ വെല്ലാൻ മറ്റൊരു ധാന്യമില്ല. പഴയകാലം മുതൽക്കേ പ്രസവരക്ഷയ്ക്കും മുലയൂട്ടുന്ന അമ്മമാർക്കും ഉലുവ പ്രധാന ഭക്ഷണമായി നൽകാറുണ്ട്. എന്നാൽ ഇന്ന് പ്രായഭേദമന്യേ എല്ലാവരും ഉലുവയെ തങ്ങളുടെ ഭക്ഷണക്രമത്തിന്റെ ഭാഗമാക്കുന്നു.
പ്രസവശേഷം ശരീരത്തിന്റെ കരുത്ത് വീണ്ടെടുക്കാനും ഹോർമോൺ സന്തുലിതാവസ്ഥ നിലനിർത്താനും ഉലുവ സഹായിക്കുന്നു. മുലയൂട്ടുന്ന അമ്മമാരിൽ പാൽ വർധിപ്പിക്കാനും ഇത് ഏറെ ഗുണകരമാണ്. അമിതവണ്ണം കുറയ്ക്കാൻ ആഗ്രഹിക്കുന്നവർക്ക് ഉലുവ ഒരു ഉത്തമ ഔഷധമാണ്. രാവിലെ വെറും വയറ്റിൽ കുതിർത്ത ഉലുവ കഴിക്കുന്നത് വിശപ്പ് കുറയ്ക്കാനും വയറിലെ കൊഴുപ്പ് നീക്കം ചെയ്യാനും സഹായിക്കും.
രക്തത്തിലെ പഞ്ചസാരയുടെ അളവ് നിയന്ത്രിക്കുന്നതിലൂടെ ടൈപ്പ്-2 പ്രമേഹത്തെ പ്രതിരോധിക്കാൻ ഉലുവയ്ക്ക് പ്രത്യേക കഴിവുണ്ട്. കൂടാതെ ശരീരത്തിലെ ചീത്ത കൊളസ്ട്രോൾ കുറച്ച് ഹൃദയാരോഗ്യം മെച്ചപ്പെടുത്താനും മുടികൊഴിച്ചിൽ തടഞ്ഞ് മുടി തഴച്ചു വളരാനും ഉലുവ സഹായിക്കുന്നു. എല്ലുകൾക്ക് ബലം നൽകാനും വാതസംബന്ധമായ അസുഖങ്ങൾ കുറയ്ക്കാനും ഉലുവ ഭക്ഷണത്തിൽ ഉൾപ്പെടുത്തുന്നത് നല്ലതാണ്.
പഴമക്കാർ ഏറെ പ്രിയത്തോടെ തയ്യാറാക്കിയിരുന്ന ഒരു വിഭവമാണ് ഉലുവ വിളയിച്ചത്. ഉലുവയുടെ കയ്പ് ഒട്ടും അനുഭവപ്പെടാത്ത രീതിയിൽ ഇത് തയ്യാറാക്കുന്നതിനായി ഒരു കിലോ ഉലുവ, അഞ്ചോ ആറോ തേങ്ങയുടെ പാൽ, ഒരു കിലോ ശർക്കര എന്നിവയാണ് പ്രധാനമായും വേണ്ടത്. തലേദിവസം രാത്രി തന്നെ ഉലുവ വെള്ളത്തിലിട്ട് കുതിർക്കാൻ വയ്ക്കണം. പിറ്റേന്ന് ഈ ഉലുവ നന്നായി വേവിച്ചെടുക്കുക. ശേഷം ഒരു ഉരുളിയിലോ കട്ടിയുള്ള പാത്രത്തിലോ തേങ്ങാപ്പാൽ ഒഴിച്ച് തിളപ്പിക്കണം. പാൽ തിളച്ചു വരുമ്പോൾ വേവിച്ചു വെച്ചിരിക്കുന്ന ഉലുവ ഇതിലേക്ക് ചേർക്കാം.
മിശ്രിതം കൈ എടുക്കാതെ ഇളക്കിക്കൊണ്ടിരിക്കാൻ ശ്രദ്ധിക്കണം. ഉലുവ വെന്ത് നന്നായി കുഴമ്പ് പരുവത്തിലാകുമ്പോൾ ശർക്കരപ്പാനി അൽപാൽപ്പമായി ചേർത്ത് മധുരം പാകമാണെന്ന് ഉറപ്പുവരുത്തണം. വിഭവം എളുപ്പം വഴന്നു കിട്ടാനായി വേണമെങ്കിൽ അല്പം അരിപ്പൊടി കൂടി ചേർക്കാവുന്നതാണ്. മിശ്രിതത്തിൽ നിന്നും എണ്ണ കിനിഞ്ഞിറങ്ങുന്ന പരുവമായാൽ ഉലുവ വിളയിച്ചത് തയ്യാറായി എന്ന് മനസ്സിലാക്കാം. കയ്പിനോട് വിമുഖതയുള്ളവർ പോലും ഏറെ താല്പര്യത്തോടെ കഴിക്കുന്ന ഈ വിഭവം ശീലിക്കുന്നത് ദീർഘകാല ആരോഗ്യത്തിന് ഏറെ ഗുണകരമാണ്.
