ആലപ്പുഴ: തിരഞ്ഞെടുപ്പ് പ്രചാരണത്തിനായി ആലപ്പുഴയിലെത്തിയ കോൺഗ്രസ് നേതാവ് രാഹുൽ ഗാന്ധിക്ക് അപ്രതീക്ഷിത സമ്മാനവുമായി യുഡിഎഫ് സ്ഥാനാർത്ഥി. ആലപ്പുഴ മണ്ഡലത്തിലെ സ്ഥാനാർത്ഥിയും മത്സ്യത്തൊഴിലാളിയുമായ എ.ഡി. തോമസ് തന്റെ പ്രിയ നേതാവിന് സമ്മാനമായി നൽകിയത് 4 കിലോഗ്രാം തൂക്കമുള്ള വലിയൊരു നെയ്മീനാണ്. അസാധാരണമായ ഈ സമ്മാനം കൈമാറുന്ന വേളയിൽ സദസ്സിൽ നിന്നും വലിയ കയ്യടിയാണ് ഉയർന്നത്.
രാഹുൽ ഗാന്ധിക്ക് മീൻ സമ്മാനിക്കണമെന്ന ആഗ്രഹം എ.ഡി. തോമസ് മുൻകൂട്ടി തന്നെ എഐസിസി ജനറൽ സെക്രട്ടറി കെ.സി. വേണുഗോപാലിനെ അറിയിച്ചിരുന്നു. തോമസിന്റെ സുഹൃത്തായ സി.എസ്. പ്രവീൺ കൊച്ചിയിൽ നിന്നാണ് ഗുണമേന്മയുള്ള നെയ്മീൻ ഇതിനായി എത്തിച്ചത്. വിവിഐപി സുരക്ഷയുള്ള വേദിയിലേക്ക് കർശനമായ സുരക്ഷാ പരിശോധനകൾക്ക് ശേഷമാണ് മീൻ എത്തിച്ചത്.
അമ്പലപ്പുഴ വളഞ്ഞവഴിയിലെ ശ്രീറാം വള്ളത്തിലെ തൊഴിലാളിയായ അനിൽകുമാറാണ് വേദിയിൽ വെച്ച് രാഹുൽ ഗാന്ധിക്ക് മീൻ കൈമാറിയത്. കൗതുകം കലർന്ന ചിരിയോടെ രാഹുൽ ഗാന്ധി സ്നേഹസമ്മാനം സ്വീകരിച്ചു. രാഷ്ട്രീയ പ്രസംഗങ്ങൾക്കിടയിൽ വേദിയിൽ നടന്ന ഈ വേറിട്ട കാഴ്ച പ്രവർത്തകർക്കിടയിൽ വലിയ ആവേശമാണ് ഉണ്ടാക്കിയത്.
