അബുദാബി: ഇന്ത്യ-പാക്കിസ്ഥാൻ സംഘർഷം രൂക്ഷമായ സാഹചര്യത്തിൽ പാക്കിസ്ഥാൻ സൂപ്പർ ലീഗിന്റെ ബാക്കി മത്സരങ്ങൾ യുഎഇയിലേക്ക് മാറ്റാനുള്ള പാക്കിസ്ഥാൻ ക്രിക്കറ്റ് ബോർഡിന്റെ നീക്കത്തിന് കനത്ത തിരിച്ചടി. പാക്കിസ്ഥാൻ സൂപ്പർ ലീഗിന് യുഎഇ അനുമതി നിഷേധിച്ചു. ഇതോടെ ടൂർണമെന്റ് അനിശ്ചിതകാലത്തേക്ക് നീട്ടിവച്ചതായി പിസിബി അറിയിച്ചു. പിഎസ്എൽ നടത്താനുള്ള പിസിബിയുടെ അഭ്യർഥന എമിറേറ്റ്സ് ക്രിക്കറ്റ് ബോർഡ് തള്ളുമെന്ന് നേരത്തെ റിപ്പോർട്ടുണ്ടായിരുന്നു. 2021-ൽ ഇന്ത്യയിൽ നടക്കേണ്ടിയിരുന്ന ടി20 ലോകകപ്പിനും 2014, 2020, 2021 വർഷങ്ങളിലെ ഐപിഎല്ലിനും ആതിഥേയത്വം വഹിച്ച ഇസിബിക്ക് ബസിസിഐയുമായി ശക്തമായ ബന്ധമാണുള്ളത്.




