പത്തനംത്തിട്ട: വയോധികന്റെ മരണത്തിൽ ദുരൂഹതയുണ്ടെന്ന ബന്ധുക്കളുടെ പരാതിയെ തുടർന്ന് കല്ലറ തുറന്ന് മൃതദേഹം പുറത്തെടുത്ത് മരണാനന്തര പരിശോധന നടത്താൻ തീരുമാനം. പുലിയൂർ പടിഞ്ഞാറേപറമ്പിൽ ബിൻസ് ഭവനിൽ എം. യേശുദാസൻ (74) മരിച്ച സംഭവത്തിൽ സംശയമുണ്ടെന്ന് ആരോപിച്ച് മരുമകൾ ലീന ബിൻസ് പരാതി നൽകി.

കഴിഞ്ഞ മാസം 20-നാണ് യേശുദാസൻ മരിച്ചത്. രക്തം ഛർദിച്ച് അവശനിലയിലായ അദ്ദേഹത്തെ ആശുപത്രിയിൽ എത്തിച്ചപ്പോഴേക്കും മരണം സംഭവിച്ചിരുന്നുവെന്നാണ് പ്രവാസിയായ ലീനയുടെ വിശദീകരണം. തുടർന്ന് 24-ന് പുലിയൂർ സെന്റ് മേരീസ് ആൻഡ് സെന്റ് ജോർജ് ഓർത്തഡോക്സ് പള്ളി ശ്മശാനത്തിൽ സംസ്കാരം നടത്തി.

മരണത്തിൽ സംശയമുണ്ടെന്ന പരാതിയുടെ അടിസ്ഥാനത്തിൽ ഈ മാസം ഒന്നിന് പൊലീസ് കേസ് രജിസ്റ്റർ ചെയ്തു. അന്വേഷണ ഉദ്യോഗസ്ഥന്റെ അഭ്യർത്ഥന പ്രകാരം മൃതദേഹം കല്ലറയിൽ നിന്ന് പുറത്തെടുത്ത് മരണാനന്തര പരിശോധന നടത്താൻ ഉത്തരവിട്ടതായി ആർ.ഡി.ഒ എം. എസ്. ഷാജു അറിയിച്ചു.

ചൊവ്വാഴ്ച രാവിലെ 10.30-ന് മൃതദേഹം പുറത്തെടുത്ത് പരിശോധന നടത്തും.