എഡിഎം നവീന് ബാബുവിന്റെ മരണത്തില് സിപിഐഎം നേതാവി പിപി ദിവ്യയുടെ മുന്കൂര് ജാമ്യഹര്ജി വിധി പറയാന് മാറ്റി. ഈ മാസം 29-ലേയ്ക്കാണ് വിധി പറയാന് മാറ്റിവെച്ചിരിക്കുന്നത്. ചൊവ്വാഴ്ച രാവിലെ 11 മണിക്കാണ് വിധി പറയുക. തലശേരി സെഷന്സ് കോടതിയുടേതാണ് വിധി.
ദിവ്യ ഉത്തരവാദിത്തം ഏറെയുളള പൊതു പ്രവര്ത്തകയെന്ന് പ്രതിഭാഗം വാദിച്ചു. പി പി ദിവ്യ അഴിമതിക്കെതിരെ ശക്തമായ നിലപാട് സ്വീകരിക്കുന്ന ആളാണ്. ഉദ്യോഗസ്ഥരുടെ അഴിമതിക്കെതിരെ ജനങ്ങള് പരാതി പറയാറുണ്ട്.
അഴിമതിക്കെതിരെ ഇടപെടേണ്ടത് പൊതുപ്രവര്ത്തകയുടെ ഉത്തരവാദിത്തമാണെന്ന് ദിവ്യയുടെ അഭിഭാഷകന് വാദം ഉന്നയിച്ചു. എഡിഎമിന്റെ ആത്മഹത്യയ്ക്ക് പിന്നാലെ ആരോപണം ഉയര്ന്നപ്പോള് തന്നെ സ്ഥാനം രാജിവെച്ചു. ആരോപണങ്ങളില് പലതും കെട്ടുകഥയാണെന്നും പ്രതിഭാഗം വാദിച്ചു.
എന്നാല് പ്രോസിക്യൂഷന് ദിവ്യയ്ക്കെതിരെ ശക്തമായ ആരോപണങ്ങള് ഉന്നയിച്ചു. ദിവ്യ നടത്തിയത് വ്യക്തിഹത്യയാണ്. ദൃശ്യങ്ങള് റെക്കോര്ഡ് ചെയ്തത് ആസൂത്രിതമായാണെന്നും ഭീഷണി സ്വരത്തിലാണ് സംസാരിച്ചതെന്നും പ്രോസിക്യൂഷന് പറഞ്ഞു.
മരിച്ചത് ജില്ലാ ഭരണകൂടത്തിലെ രണ്ടാം സ്ഥാനത്തുള്ള ഉദ്യോഗസ്ഥനാണെന്നത് പ്രധാനമെന്ന് പ്രോസിക്യൂഷന് വ്യക്തമാക്കി. വ്യക്തിഹത്യയാണ് മരണകാരണം എന്ന് പ്രോസിക്യൂഷന് പറഞ്ഞപ്പോള് എതിര്പ്പറിയിച്ച പ്രതിഭാഗത്തെ കോടതി വിമര്ശിച്ചു. ഒന്നര മണിക്കൂര് സംസാരിച്ചില്ലേ, ഇനി അല്പ്പം കേള്ക്കൂ എന്ന് കോടതി ആവശ്യപ്പെട്ടു.
