മലപ്പുറം: ആശുപത്രികളിലും ആരോഗ്യ സ്ഥാപനങ്ങളിലും രോഗികളോടും സന്ദർശകരോടും മാന്യമായി പെരുമാറാൻ ആരോഗ്യവകുപ്പ് ജീവനക്കാർക്ക് കർശന നിർദേശം. ആരോഗ്യവകുപ്പ് ഡയറക്ടർ തിരുവനന്തപുരം ഡയറക്ടറേറ്റിലെ വിജിലൻസ് ശുപാർശയെ അടിസ്ഥാനമാക്കി എല്ലാ സ്ഥാപനമേധാവികൾക്കും സർക്കുലർ അയച്ചു.
കഴിഞ്ഞ ദിവസം കോഴിക്കോട്ട് സർക്കാർ ആശുപത്രിയിൽ ജനപ്രതിനിധിയോട് മോശമായി പെരുമാറിയ സംഭവവും വ്യാപക വിവാദമായിരുന്നു. ഇതുപോലുള്ള പ്രശ്നങ്ങൾ തടയാനും ചികിത്സയിലും സേവനത്തിലുമെത്തുന്നവർക്കുള്ള മാന്യത ഉറപ്പാക്കാനും സർക്കുലറാണ് ഇറക്കിയിരിക്കുന്നത്. സർക്കാർ ആശുപത്രികളിലും ആരോഗ്യസ്ഥാപനങ്ങളിലും വരുന്ന എല്ലാവരോടും മാന്യമായി പെരുമാറണമെന്നും, ഫോൺ വഴി ഇടപെടുമ്പോഴും വിനീതമായി സംസാരിക്കണമെന്നും നിർദേശത്തിൽ വ്യക്തമാക്കിയിട്ടുണ്ട്. മോശം പെരുമാറ്റം ശ്രദ്ധയിൽപ്പെട്ടാൽ കർശന നടപടികൾ കൈക്കൊള്ളുമെന്ന് അധികൃതർ അറിയിച്ചു.
