കോഴിക്കോട്: വെൽഫെയർ പാർട്ടി പരിപാടിയുടെ നോട്ടീസിൽ തന്റെ പേര് വന്നത് എങ്ങനെയെന്ന് അറിയില്ലെന്ന് പേരാമ്പ്രയിലെ യുഡിഎഫ് സ്ഥാനാർഥി ഫാത്തിമ തഹിലിയ വ്യക്തമാക്കി. ഇത്തരം പരിപാടികളിലേക്ക് വ്യക്തിപരമായി ക്ഷണം ലഭിക്കാറില്ലെന്നും, കമ്മിറ്റിയിലൂടെ മാത്രമാണ് കാര്യങ്ങൾ തീരുമാനിക്കപ്പെടുന്നതെന്നും അവർ മാധ്യമങ്ങളോട് പറഞ്ഞു.
കമ്മിറ്റി തീരുമാനിച്ചാൽ വെൽഫെയർ പാർട്ടി പരിപാടിയിൽ പങ്കെടുക്കുമോ എന്ന ചോദ്യത്തിന്, അതും കമ്മിറ്റിയുടെ തീരുമാനമായിരിക്കുമെന്ന് ഫാത്തിമ തഹിലിയ പ്രതികരിച്ചു. വെൽഫെയർ പാർട്ടിയുടെ പിന്തുണ സ്വീകരിക്കുമോ എന്ന ചോദ്യത്തിന്, വോട്ട് ചെയ്യേണ്ടത് ആ പാർട്ടിയുടെ തീരുമാനമാണെന്നും അവർ വ്യക്തമാക്കി.
വെൽഫെയർ പാർട്ടിയെ ചുറ്റിപ്പറ്റി വിവാദങ്ങൾ സൃഷ്ടിക്കുന്നത് എൽഡിഎഫിന്റെ രാഷ്ട്രീയ തന്ത്രമാണെന്നും ഫാത്തിമ തഹിലിയ ആരോപിച്ചു. പേരാമ്പ്ര മണ്ഡലത്തിൽ വെൽഫെയർ പാർട്ടിയുടെ വോട്ട് നേടിയതാണ് ഇത്രയും കാലം എൽഡിഎഫ് വിജയിച്ചതെന്നും അവർ ചൂണ്ടിക്കാട്ടി.
എപ്പോൾ മുതൽ വെൽഫെയർ പാർട്ടിയുമായി എൽഡിഎഫിന് ബന്ധമില്ലാതായെന്ന് വ്യക്തമാക്കണമെന്നും, താൻ ആരുടെയെങ്കിലും നോമിനിയാണെന്ന് തെളിയിക്കണമെന്നും ഫാത്തിമ തഹിലിയ വെല്ലുവിളിച്ചു. സമുദായത്തിന്റെ പേരിൽ വോട്ട് അഭ്യർഥിച്ചെന്ന പരാതിയിൽ തനിക്ക് ഇതുവരെ നോട്ടീസ് ലഭിച്ചിട്ടില്ലെന്നും അവർ കൂട്ടിച്ചേർത്തു.
