ഡല്ഹി: വീണ്ടും മുന്നറിയിപ്പില്ലാതെ ഡാം തുറന്നു വിട്ട് ഇന്ത്യ. ചെനാബ് നദിയിലുളള സലാല് അണക്കെട്ടിന്റെ ഒരു ഷട്ടറാണ് മുന്നറിയിപ്പില്ലാതെ ഇന്ത്യ തുറന്നിരിക്കുന്നത്. ഇതോടെ പാകിസ്താന്റെ താഴ്ന്ന പ്രദേശങ്ങള് വെളളപ്പൊക്ക ഭീതിയിലാണ്. നദിയുടെ ഒഴുക്കില് പെട്ടെന്നുണ്ടാകുന്ന മാറ്റങ്ങള് മേഖലയെ സാരമായി ബാധിക്കും.
ജമ്മു കശ്മീരിലെ റിയാസിയില് മഴ തുടര്ച്ചയായി പെയ്യുന്നതിനാല് ജലനിരപ്പ് ഉയരുകയാണ്. ഇത് നിയന്ത്രിക്കുന്നതിനായാണ് അണക്കെട്ടിന്റെ ഷട്ടര് തുറന്നത്. അതേസമയം ഷട്ടര് തുറന്നുവിട്ടത് പാകിസ്താന് ആശങ്കയുയര്ത്തിയിട്ടുണ്ട്. പാകിസ്താനെ ഔദ്യോഗികമായി അറിയിക്കാതെയാണ് ഇന്ത്യ ഡാമിന്റെ ഷട്ടറുകള് തുറന്നത്.
ഇന്ത്യയിൽ നിന്ന് പാകിസ്താനിലേക്ക് ഒഴുകുന്ന പ്രധാന നദികളിലൊന്നാണ് ചെനാബ്. പഹല്ഗാമില് ഭീകരാക്രമണം നടന്നതിനു ചെനാബ് നദിയിലെ ബഗ്ലിഹാര് ഡാമിന്റെയും സലാല് ഡാമിന്റെയും ഷട്ടറുകള് ഇന്ത്യ പൂര്ണമായും അടച്ചിരുന്നു. ബഗ്ലിഹാര് അണക്കെട്ടില്നിന്ന് പാകിസ്താനിലേക്കുള്ള വെള്ളത്തിന്റെ ഒഴുക്ക് കുറയ്ക്കാന് ഷട്ടര് താഴ്ത്തിയത്. ഇന്ത്യയുടെ ഈ നീക്കം പാകിസ്താനിലെ പഞ്ചാബ് പ്രവിശ്യയെയാണ് നേരിട്ട് ബാധിക്കുക.
