ന്യൂഡൽഹി : ഡൽഹിയിൽ നിന്ന് ഹൈദരാബാദിലേക്കുള്ള വിമാനയാത്രയ്ക്കിടെയുണ്ടായ മോശം അനുഭവം പപങ്കുവെച്ച് ഇൻഡിഗോ യാത്രക്കാരൻ. യാത്രക്കാരനായ അഭിഷേക് കുമാർ ആണ് താൻ നേരിട്ട മോശം അനുഭവം പങ്കുവെച്ചെത്തിയത്. കൂടാതെ തന്റെ കേടായ ലഗേജിന്റെ ചിത്രങ്ങളും അദ്ദേഹം സമൂഹമാധ്യമത്തിൽ പോസ്റ്റ് ചെയ്തിരുന്നു. ചെക്ക് ഇൻ ലഗേജിനാണ് സാരമായ കേടുപാടുകൾ സംഭവിച്ചിരിക്കുന്നത്. ഡൽഹിയിലെ ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ ചെക്ക്-ഇൻ ചെയ്യുമ്പോൾ ഉണ്ടായിരുന്നതിനേക്കാൾ ഒരു കിലോഗ്രാം ഭാരം കുറവാണെന്ന് തോന്നുന്ന തന്റെ ബാഗിൽ നിന്ന് നിരവധി വസ്തുക്കൾ നഷ്ടപ്പെട്ടതായും അദ്ദേഹം അവകാശപ്പെട്ടു.
“എന്റെ ലഗേജ് ഒരു WWE മത്സരത്തിൽ നിന്ന് രക്ഷപ്പെട്ടതുപോലെ തോന്നി – സിപ്പുകൾ പോയി, പൂട്ടുകൾ നഷ്ടപ്പെട്ടു, ഉള്ളടക്കങ്ങൾ വ്യക്തമായി മാറ്റിയിരിക്കുന്നു, അതിശയിപ്പിക്കുന്ന അത്ഭുതം: ഇനങ്ങൾ നഷ്ടപ്പെട്ടു! IGI-യിൽ എന്റെ ബാഗിന്റെ ഭാരം 14 കിലോയിൽ കൂടുതലായിരുന്നു. ഹൈദരാബാദിൽ വെച്ച് അത് കിട്ടിയപ്പോഴേക്കും അത് കഷ്ടിച്ച് 13 കിലോ മാത്രമായിരുന്നു,” അഭിഷേക് കുമാർ തന്റെ പോസ്റ്റിൽ പറഞ്ഞു. അതേസമയം വൈറലായ പരാതിയോട് പ്രതികരിച്ച് ഇൻഡിഗോ എത്തിയിരുന്നു. പരാതിക്കാരന്റെ കോൺടാക്റ്റ് വിശദാംശങ്ങളും ഇവർ ചോദിച്ചറിഞ്ഞിട്ടുണ്ടെന്നാണ് വിവരം.
അതേസമയം ഇതാദ്യമായല്ല ഇത്തരത്തിൽ ഒരു സംഭവം ഇൻഡിഗോയിൽ റിപ്പോർട്ട് ചെയുന്നത്. ഈ മാസം ആദ്യം, ഗോവയിൽ നിന്നുള്ള ഒരു സ്ത്രീ തന്റെ ചെക്ക്-ഇൻ ബാഗേജ് കേടായിരിക്കുന്നതായി കണ്ട് ഇൻഡിഗോയെ വിളിച്ചിരുന്നു .ആവർത്തിച്ചുള്ള തുടർനടപടികൾ ഉണ്ടായിരുന്നിട്ടും എയർലൈൻ പ്രതികരിച്ചില്ലെന്ന് ഇവർ അവകാശപ്പെട്ടിരുന്നു.
