ലോകത്തെ സാങ്കേതിക വിദ്യയുടെ ഗതി മാറ്റിമറിക്കാൻ പോകുന്ന ആർട്ടിഫിഷ്യൽ ഇന്റലിജൻസ് (AI) വിപ്ലവത്തിൽ വൈറ്റ് കോളർ തൊഴിൽ മേഖല വലിയ പ്രതിസന്ധി നേരിടുമെന്ന് മൈക്രോസോഫ്റ്റ് സഹസ്ഥാപകൻ ബിൽ ഗേറ്റ്സിന്റെ മുന്നറിയിപ്പ് നൽകി. സ്വിറ്റ്സർലൻഡിലെ ദാവോസിൽ നടക്കുന്ന ലോക സാമ്പത്തിക ഫോറത്തിനിടെ എൻഡിടിവിക്ക് നൽകിയ അഭിമുഖത്തിലാണ് അദ്ദേഹം ഈ മുന്നറിയിപ്പ് നൽകിയത്.
അടുത്ത നാല് മുതൽ അഞ്ച് വർഷത്തിനുള്ളിൽ എഐയുടെ കടന്നുകയറ്റം തൊഴിൽ വിപണിയെ സങ്കീർണ്ണമാക്കുമെന്നും എന്നാൽ, ഈ സാഹചര്യത്തെ നേരിടാൻ ലോക രാജ്യങ്ങളിലെ സർക്കാരുകൾ സജ്ജരല്ലെന്നും ബിൽ ഗേറ്റ്സ് ചൂണ്ടിക്കാട്ടി. സോഫ്റ്റ്വെയർ വികസനം, ലോജിസ്റ്റിക്സ്, കോൾ സെന്ററുകൾ തുടങ്ങിയ മേഖലകളിൽ എഐ ഇതിനോടകം തന്നെ ഉൽപ്പാദനക്ഷമത വർദ്ധിപ്പിക്കുകയും കുറഞ്ഞ വൈദഗ്ധ്യം ആവശ്യമുള്ള ജോലികൾ മാറ്റിസ്ഥാപിക്കുകയും ചെയ്യുന്നുണ്ട്.
അടുത്ത 4 മുതൽ 5 വർഷത്തിനുള്ളിൽ വൈറ്റ് കോളർ ജോലികളെയും (ഓഫീസ് ജോലികൾ) തുടർന്ന് ബ്ലൂ കോളർ ജോലികളെയും ഇത് കാര്യമായി ബാധിക്കും. കൃത്യമായ നയരൂപീകരണം നടത്തിയില്ലെങ്കിൽ, എ.ഐ സമ്പത്തും അവസരങ്ങളും ചുരുക്കം ചിലരിലേക്ക് മാത്രം ഒതുക്കുകയും സാമ്പത്തിക അസമത്വം വർദ്ധിപ്പിക്കുകയും ചെയ്യുമെന്ന് അദ്ദേഹം പറഞ്ഞു.
