കോട്ടയം: ആരോഗ്യരംഗത്ത് മികച്ച നേട്ടവുമായി മാഞ്ഞൂർ ഗ്രാമപഞ്ചായത്ത്. കുറുപ്പന്തറ കുടുംബാരോഗ്യ കേന്ദ്രത്തിനു കീഴിലുള്ള മൂന്ന് ജനകീയ ആരോഗ്യ കേന്ദ്രങ്ങൾക്ക് ദേശീയ ഗുണനിലവാര അംഗീകാരമായ എൻ.ക്യു.എ.എസ്. (NQAS) ലഭിച്ചു. ജില്ലയിൽ ആദ്യമായാണ് ഒരു കുടുംബാരോഗ്യ കേന്ദ്രത്തിന് കീഴിലുള്ള മൂന്ന് ഉപകേന്ദ്രങ്ങൾക്കും ഒരേസമയം ഈ അന്താരാഷ്ട്ര നിലവാരത്തിലുള്ള അംഗീകാരം ലഭിക്കുന്നത് എന്നത് ശ്രദ്ധേയമാണ്. മേമുറി, മാഞ്ഞൂർ സൗത്ത്, ഓമല്ലൂർ എന്നീ ജനകീയ ആരോഗ്യകേന്ദ്രങ്ങളാണ് ഈ അഭിമാന നേട്ടം കൈവരിച്ചത്.
ആരോഗ്യവകുപ്പ് നിഷ്കർഷിച്ചിട്ടുള്ള 12 സേവന പാക്കേജുകളുടെ മികവ് അടിസ്ഥാനമാക്കിയാണ് കേന്ദ്ര സംഘം ഈ അംഗീകാരം നൽകുന്നത്. മൂന്ന് വർഷത്തേക്കാണ് ഈ പദവി ലഭിക്കുക. ഓരോ വർഷവും സംസ്ഥാനതല പരിശോധനയും മൂന്ന് വർഷത്തിന് ശേഷം ദേശീയ സംഘത്തിന്റെ പുനഃപരിശോധനയും ഉണ്ടാകും.
അംഗീകാരം ലഭിച്ച കേന്ദ്രങ്ങൾക്ക് ഒരു പാക്കേജിന് 18,000 രൂപ വീതം വാർഷിക ഇൻസെന്റീവ് ആയി ലഭിക്കും. ഈ തുക ഉപയോഗിച്ച് ആരോഗ്യകേന്ദ്രങ്ങളിൽ കൂടുതൽ വികസന പ്രവർത്തനങ്ങൾ നടത്താൻ സാധിക്കും. മാഞ്ഞൂർ പഞ്ചായത്തിലെ സാധാരണക്കാർക്ക് മികച്ച ആരോഗ്യ പരിപാലനം ഉറപ്പുവരുത്താൻ ഈ ദേശീയ അംഗീകാരം വലിയ കരുത്താകുമെന്ന് വിലയിരുത്തപ്പെടുന്നു.
