നമ്മുടെ അടുക്കളകളിലെ ഒഴിച്ചുകൂടാനാവാത്ത പച്ചക്കറികളിലൊന്നാണ് സവാള. സവാള ചേർക്കാത്ത കറികൾ മലയാളികൾക്ക് ചിന്തിക്കാൻ പോലും പ്രയാസമാണ്. കറികളിൽ വേവിച്ചു ചേർക്കുന്നതിന് പുറമെ, സാലഡുകളിലും വറുത്ത മീൻ, ചിക്കൻ വിഭവങ്ങളിലും സാൻഡ്‌വിച്ചുകളിലും രുചി വർദ്ധിപ്പിക്കാൻ നാം സവാള പച്ചയ്ക്ക് ധാരാളമായി ഉപയോഗിക്കാറുണ്ട്. വൈറ്റമിൻ സി, ബി6, പൊട്ടാസ്യം എന്നിവയാൽ സമ്പന്നമായ സവാളയിൽ ക്വെർസെറ്റിൻ പോലുള്ള ശക്തമായ ആന്റിഓക്‌സിഡന്റുകൾ അടങ്ങിയിട്ടുണ്ട്. ഇവ ഹൃദയാരോഗ്യം മെച്ചപ്പെടുത്താനും ശരീരത്തിലെ വീക്കം കുറയ്ക്കാനും സഹായിക്കുന്നു. കൂടാതെ, സവാളയിലെ സൾഫർ സംയുക്തങ്ങൾ രക്തത്തിലെ പഞ്ചസാരയുടെ അളവ് നിയന്ത്രിക്കാൻ സഹായിക്കുന്നതിനാൽ പ്രമേഹരോഗികൾക്കും ഇത് ഗുണകരമാണ്. എന്നാൽ, ഇത്രയേറെ ആരോഗ്യഗുണങ്ങൾ ഉണ്ടെങ്കിലും സവാള പച്ചയ്ക്ക് കഴിക്കുന്നത് എല്ലാവർക്കും ഒരുപോലെ ഗുണകരമല്ലെന്നാണ് ആരോഗ്യവിദഗ്ധർ പറയുന്നത്.

സവാള പച്ചയ്ക്ക് കഴിക്കുന്ന സമയത്ത് അവ ദഹിപ്പിക്കാൻ നമ്മുടെ ദഹനവ്യവസ്ഥയ്ക്ക് അല്പം പ്രയാസമാണ്. ഇതിൽ അടങ്ങിയിരിക്കുന്ന ‘ഫ്രക്ടൻസ്’ എന്ന കാർബോഹൈഡ്രേറ്റ് പലരിലും ഗ്യാസ്, വയറുവേദന, വയർ വീർക്കൽ, വയറിളക്കം എന്നിവയ്ക്ക് കാരണമാകാറുണ്ട്. ഇറിറ്റബിൾ ബവൽ സിൻഡ്രോം പോലുള്ള ദഹന പ്രശ്നങ്ങളുള്ളവർക്ക് സവാള പച്ചയ്ക്ക് കഴിക്കുന്നത് ലക്ഷണങ്ങൾ വഷളാക്കാൻ ഇടയാക്കും. അതുപോലെ തന്നെ നെഞ്ചെരിച്ചിലോ ആസിഡ് റിഫ്ലക്സോ ഉള്ളവർക്കും പച്ച സവാള അത്ര നല്ലതല്ല. ഇത് അന്നനാളത്തിലെ പേശികളെ അയവുള്ളതാക്കുകയും ആമാശയത്തിലെ ആസിഡ് മുകളിലേക്ക് വരാൻ കാരണമാവുകയും ചെയ്യുന്നു. ഇതിന്റെ ഫലമായി, പ്രത്യേകിച്ചും വൈകുന്നേരങ്ങളിലോ ഉറങ്ങുന്നതിന് തൊട്ടുമുമ്പോ സവാള കഴിക്കുന്നത് നെഞ്ചിലും തൊണ്ടയിലും കഠിനമായ അസ്വസ്ഥതയുണ്ടാക്കും.
സവാള പച്ചയ്ക്ക് കഴിക്കുമ്പോൾ നേരിടുന്ന മറ്റൊരു പ്രധാന വെല്ലുവിളിയാണ് രൂക്ഷമായ വായനാറ്റം. സവാളയിലടങ്ങിയിരിക്കുന്ന സൾഫർ സംയുക്തങ്ങളാണ് ഈ ഗന്ധത്തിന് കാരണം. ഇവ രക്തത്തിൽ കലരുകയും ശ്വാസകോശത്തിലൂടെ പുറന്തള്ളപ്പെടുകയും ചെയ്യുന്നതിനാൽ ബ്രഷ് ചെയ്താലോ മൗത്ത് വാഷ് ഉപയോഗിച്ചാലോ ഗന്ധം പൂർണ്ണമായും മാറണമെന്നില്ല.

ഗ്രീൻ ടീ കുടിക്കുന്നത് ഗന്ധം കുറയ്ക്കാൻ സഹായിക്കുമെങ്കിലും അത് പൂർണ്ണമായ പരിഹാരമല്ല. ദന്താരോഗ്യത്തെ സംബന്ധിച്ചിടത്തോളം, സവാളയ്ക്ക് ബാക്ടീരിയകളെ നശിപ്പിക്കാനുള്ള ശേഷിയുണ്ടെങ്കിലും അതിന്റെ തീക്ഷ്ണമായ നീര് മോണകളിൽ അസ്വസ്ഥതയുണ്ടാക്കാം. സവാള കഷ്ണങ്ങൾ പല്ലുകൾക്കിടയിൽ തങ്ങിനിൽക്കുന്നത് പ്ലാക്ക് ഉണ്ടാകാൻ കാരണമാകുമെന്നതിനാൽ കഴിച്ചശേഷം വായ നന്നായി ശുദ്ധിയാക്കേണ്ടത് അത്യാവശ്യമാണ്.അപൂർവ്വമാണെങ്കിലും ചിലരിൽ സവാള അലർജിക്ക് കാരണമാകാറുണ്ട്. പച്ച സവാള കഴിക്കുന്നത് ചർമ്മത്തിൽ ചൊറിച്ചിൽ, തടിപ്പ്, ചുണ്ടിലോ നാവിലോ ഉണ്ടാകുന്ന വീക്കം, കണ്ണ് നനയുക എന്നിവയ്ക്ക് കാരണമായേക്കാം.

ഗുരുതരമായ സാഹചര്യങ്ങളിൽ ശ്വാസംമുട്ടൽ വരെ ഉണ്ടായേക്കാമെന്നതിനാൽ ഇത്തരം ലക്ഷണങ്ങൾ കണ്ടാൽ ഉടൻ ഡോക്ടറെ കാണണം. കൂടാതെ, സവാളയിലെ ‘ടൈറാമിൻ’ എന്ന സംയുക്തം ചിലരിൽ മൈഗ്രേൻ അല്ലെങ്കിൽ കഠിനമായ തലവേദനയ്ക്കും കാരണമാകാറുണ്ട്. വിട്ടുമാറാത്ത മൈഗ്രേൻ ഉള്ളവർ പച്ച സവാള കഴിക്കുമ്പോൾ തലവേദന വർദ്ധിക്കുന്നുണ്ടോ എന്ന് പ്രത്യേകം നിരീക്ഷിക്കണം.
മരുന്നുകൾ കഴിക്കുന്നവരും സവാളയുടെ കാര്യത്തിൽ ശ്രദ്ധിക്കേണ്ടതുണ്ട്. രക്തം കട്ടപിടിക്കുന്നത് തടയാനുള്ള മരുന്നുകൾ കഴിക്കുന്നവർ സവാള അമിതമായി ഉപയോഗിക്കുന്നത് ഒഴിവാക്കണം, കാരണം ഇതിന് രക്തം നേർപ്പിക്കാനുള്ള നേരിയ ഗുണമുണ്ട്. പ്രമേഹ രോഗികളും ഇതിന്റെ ഉപയോഗത്തിൽ മിതത്വം പാലിക്കുന്നത് നല്ലതാണ്. സവാള പച്ചയ്ക്ക് കഴിക്കുന്നത് നല്ലതാണെങ്കിലും അസ്വസ്ഥതകൾ അനുഭവപ്പെടുന്നുണ്ടെങ്കിൽ അവ ഒഴിവാക്കുകയോ വേവിച്ചു മാത്രം ഉപയോഗിക്കുകയോ ചെയ്യുക. ഏതെങ്കിലും തരത്തിലുള്ള വിട്ടുമാറാത്ത ആരോഗ്യപ്രശ്നങ്ങൾ ഉള്ളവർ ഡോക്ടറുടെ ഉപദേശം തേടുന്നത് ഉചിതമായിരിക്കും.