തിരുവനന്തപുരം: ആരോഗ്യവകുപ്പ് പ്രിൻസിപ്പൽ സെക്രട്ടറി ശർമിള മേരി ജോസഫിനെ തൽസ്ഥാനത്ത് നിന്ന് മാറ്റണമെന്ന് ആവശ്യപ്പെട്ട് ആരോഗ്യ മന്ത്രി കെ. മുരളീധരൻ മുഖ്യമന്ത്രിയെ സമീപിച്ചു. മുഖ്യമന്ത്രിയുമായി നേരിട്ട് സംസാരിച്ചാണ് മന്ത്രി ആവശ്യം ഉന്നയിച്ചത്.
വകുപ്പിൽ മന്ത്രി നിർദേശിച്ച പല പ്രധാന അന്വേഷണങ്ങളും പ്രിൻസിപ്പൽ സെക്രട്ടറി മുന്നോട്ട് കൊണ്ടുപോകുന്നില്ലെന്നാണ് മന്ത്രിയുടെ പരാതി. പ്രധാനപ്പെട്ട ഫയലുകളിൽ തീരുമാനമെടുക്കാതെ വൈകിപ്പിക്കുന്നതായും മന്ത്രി മുഖ്യമന്ത്രിയെ അറിയിച്ചു.
പ്രിൻസിപ്പൽ സെക്രട്ടറിയുടെ പ്രവർത്തനരീതിയിൽ നേരത്തെയും മന്ത്രി പരസ്യമായി അതൃപ്തി പ്രകടിപ്പിച്ചിരുന്നു. മരുന്നുകൾ വാങ്ങുന്നതുമായി ബന്ധപ്പെട്ട ചില പ്രധാന നടപടികളെ പ്രിൻസിപ്പൽ സെക്രട്ടറി എതിർത്തതും നേരത്തെ വിവാദമായിരുന്നു.
മന്ത്രിയും പ്രിൻസിപ്പൽ സെക്രട്ടറിയും തമ്മിലുള്ള അഭിപ്രായ വ്യത്യാസം ഇതോടെ കൂടുതൽ രൂക്ഷമായിരിക്കുകയാണ്. നിലവിലെ സാഹചര്യത്തിലാണ് പ്രിൻസിപ്പൽ സെക്രട്ടറിയെ അടിയന്തരമായി മാറ്റണമെന്ന ആവശ്യം മന്ത്രി മുന്നോട്ടുവെച്ചത്.
