അനീഷ എം എ: സബ് എഡിറ്റർ
പാലക്കാട്: സംസ്ഥാനത്ത് വൈദ്യുതി നിരക്ക് വര്ധിപ്പിക്കുമെന്ന് വൈദ്യുതി മന്ത്രി കെ കൃഷ്ണന് കുട്ടി. വൈദ്യുതി നിരക്ക് വര്ധിപ്പിക്കേണ്ടത് അനിവാര്യമാണെന്നും പ്രത്യേക സമ്മര് താരിഫ് ഏര്പ്പെടുത്തുന്നത് പരിഗണനയിലാണെന്നും അദ്ദേഹം പറഞ്ഞു. നിരക്ക് വര്ധനവുമായി ബന്ധപ്പെട്ട് റെഗുലേറ്ററി കമ്മീഷന് തെളിവെടുപ്പ് പൂര്ത്തിയാക്കി. റിപ്പോര്ട്ട് കെഎസ്ഇബിക്ക് നല്കിയാല് ആലോചിച്ച് തീരുമാനമെടുക്കുമെന്നും മന്ത്രി പറഞ്ഞു.
ആഭ്യന്തര ഉല്പാദനം കുറഞ്ഞത് തിരിച്ചടിയായിരിക്കുകയാണ്. ഇതിനാല് തന്നെ വൈദ്യുതി നിരക്ക് വര്ധനവ് അനിവാര്യമാണ്. വേനല്കാലത്ത് പുറമെനിന്ന് വൈദ്യുതി വാങ്ങുന്നത് പ്രതിസന്ധിയാണ്. ഇത് മറികടക്കാനാണ് സമ്മര് താരിഫ് പരിഗണിക്കുന്നതെന്നും മന്ത്രി പറഞ്ഞു. നിരക്ക് വര്ധനവിന് പുറമെ വേനല് കാലത്ത് മാത്രമായി പ്രത്യേക നിരക്ക് ഏര്പ്പെടുത്തുന്നതാണ് പരിഗണിക്കുന്നത്. സര്ക്കാരുമായും ഉപഭോക്താക്കളുമായും ചര്ച്ചചെയ്ത് നയപരമായ തീരുമാനമെടുക്കുമെന്നും കെ കൃഷ്ണന്കുട്ടി പറഞ്ഞു.
