നമ്മുടെ നിത്യജീവിതത്തിൽ മിക്കവരും നേരിടുന്ന സർവ്വസാധാരണമായ അസ്വസ്ഥതകളാണ് അസിഡിറ്റിയും നെഞ്ചെരിച്ചിലും. ഒരു ഗ്ലാസ് മോരോ അല്ലെങ്കിൽ ഏതെങ്കിലും ആന്റാസിഡ് ഗുളികയോ കഴിച്ചാൽ തീരാവുന്ന ചെറിയൊരു ദഹനപ്രശ്നമായിട്ടാണ് പലരും ഇതിനെ കാണുന്നത്. എന്നാൽ, “വെറും ഗ്യാസ് അല്ലേ” എന്ന് കരുതി നമ്മൾ നിസ്സാരമായി തള്ളിക്കളയുന്ന ഈ ലക്ഷണങ്ങൾ യഥാർത്ഥത്തിൽ നിങ്ങളുടെ ശരീരം നൽകുന്ന ഗൗരവകരമായ അപകട സൂചനയാകാം. കൃത്യസമയത്ത് ശരിയായ ചികിത്സ ലഭിച്ചില്ലെങ്കിൽ, ഇത് നിങ്ങളുടെ ജീവിതത്തെ തന്നെ അപകടത്തിലാക്കുന്ന സങ്കീർണ്ണമായ ആരോഗ്യപ്രശ്നങ്ങളിലേക്ക് നയിക്കാം.
സാധാരണമായി കണ്ടുവരുന്ന അസിഡിറ്റി അത്ര നിസ്സാരക്കാരനല്ലെന്ന് പ്രമുഖ ഹാർവാർഡ് ട്രെയിൻഡ് ഗ്യാസ്ട്രോ എൻട്രോളജിസ്റ്റ് ഡോ. സൗരഭ് സേത്തി മുന്നറിയിപ്പ് നൽകുന്നു. വിട്ടുമാറാത്ത അസിഡിറ്റി ക്രമേണ ഈസോഫാഗൽ കാൻസർ അഥവാ അന്നനാളത്തിലെ കാൻസറിലേക്ക് നയിച്ചേക്കാമെന്നാണ് അദ്ദേഹം തന്റെ ഇൻസ്റ്റഗ്രാം വീഡിയോയിലൂടെ ചൂണ്ടിക്കാട്ടുന്നത്. വർഷങ്ങളോളം നെഞ്ചെരിച്ചിൽ അവഗണിക്കുകയും പിന്നീട് അത് കാൻസറായി മാറുകയും ചെയ്ത ഒരു രോഗിയുടെ അനുഭവം പങ്കുവെച്ചുകൊണ്ടാണ് അദ്ദേഹം ഈ വിഷയത്തിന്റെ ഗൗരവം വ്യക്തമാക്കുന്നത്.
നമ്മൾ ഭക്ഷണം കഴിക്കുമ്പോൾ ആമാശയത്തെയും അന്നനാളത്തെയും തമ്മിൽ വേർതിരിക്കുന്ന ഒരു വാൽവുണ്ട്. ഭക്ഷണത്തിന് ശേഷം ഈ വാൽവ് കൃത്യമായി അടയാതിരിക്കുമ്പോഴാണ് നെഞ്ചെരിച്ചിൽ ഉണ്ടാകുന്നത്. ഈ അവസ്ഥയിൽ ആമാശയത്തിലെ തീവ്രതയേറിയ ആസിഡ് മുകളിലേക്ക് (അന്നനാളത്തിലേക്ക്) ഒഴുകുകയും അന്നനാളത്തിന്റെ മൃദുവായ ഉൾഭിത്തിയെ നശിപ്പിക്കുകയും ചെയ്യുന്നു. ഈ പ്രക്രിയ തുടർച്ചയായി സംഭവിക്കുമ്പോൾ ‘ബാറെറ്റ്സ് ഈസോഫാഗസ്’ (Barrett’s Esophagus) എന്ന പ്രീ-കാൻസർ അവസ്ഥയിലേക്ക് രോഗി എത്തുന്നു. ഇത് പിന്നീട് അന്നനാള കാൻസറായി മാറാനുള്ള സാധ്യത വളരെ കൂടുതലാണ്.
ഭക്ഷണം ഇറക്കാൻ പ്രയാസം അനുഭവപ്പെടുകയോ, ഭക്ഷണം തൊണ്ടയിൽ കുടുങ്ങുന്നത് പോലെ തോന്നുകയോ ചെയ്യുന്നത് അസിഡിറ്റിയുടെ ഭാഗമായി കാണുന്ന സാധാരണ ലക്ഷണങ്ങളല്ല. വിട്ടുമാറാത്ത പുളിച്ചുതികട്ടലിനൊപ്പം ഇത്തരം ബുദ്ധിമുട്ടുകൾ കൂടി ഉണ്ടെങ്കിൽ ഒട്ടും വൈകാതെ ഒരു വിദഗ്ധ ഡോക്ടറുടെ സേവനം തേടേണ്ടത് അനിവാര്യമാണ്. ജീവിതശൈലിയിൽ വരുത്തുന്ന ചെറിയ മാറ്റങ്ങളിലൂടെ ഒരു പരിധി വരെ അസിഡിറ്റിയെ പ്രതിരോധിക്കാൻ സാധിക്കും. എങ്കിലും ആന്റാസിഡുകളെ അമിതമായി ആശ്രയിക്കുന്നത് യഥാർത്ഥ രോഗത്തെ മറച്ചുവെക്കാൻ മാത്രമേ സഹായിക്കൂ.
അസിഡിറ്റി തടയാൻ ലളിതമായ ചില മാർഗ്ഗങ്ങൾ ഡോക്ടർമാർ നിർദ്ദേശിക്കുന്നുണ്ട്. രാത്രിയിൽ ഉറങ്ങുമ്പോൾ ഇടതുവശം ചരിഞ്ഞു കിടക്കുന്നത് ആസിഡ് മുകളിലേക്ക് കയറുന്നത് തടയാൻ സഹായിക്കും. രാത്രി വൈകി ഭക്ഷണം കഴിക്കുന്ന രീതി ഒഴിവാക്കുകയും അത്താഴത്തിന് എളുപ്പത്തിൽ ദഹിക്കുന്ന ലഘുഭക്ഷണങ്ങൾ തിരഞ്ഞെടുക്കുകയും ചെയ്യുക. ഭക്ഷണത്തിന് ശേഷം മധുരം ചേർക്കാത്ത പെരുംജീരകം ചവയ്ക്കുന്നത് ദഹനം സുഗമമാക്കാൻ നല്ലതാണ്. എന്നാൽ ഇത്തരം മുൻകരുതലുകൾ എടുത്തിട്ടും അസ്വസ്ഥതകൾ തുടരുകയാണെങ്കിൽ അത് ഗൗരവമായി തന്നെ കാണണം.
അസിഡിറ്റിയെ ജീവിതത്തിന്റെ ഭാഗമായി കാണുന്ന ശീലം നമ്മൾ മാറ്റണം. സ്വയം ചികിത്സയിലൂടെ താൽക്കാലിക ആശ്വാസം കണ്ടെത്തുന്നത് രോഗാവസ്ഥയെ സങ്കീർണ്ണമാക്കുകയേ ഉള്ളൂ. ശരീരം നൽകുന്ന അപായസൂചനകൾ തിരിച്ചറിഞ്ഞ് കൃത്യസമയത്ത് പരിശോധനകൾ നടത്തുന്നത് വലിയ അപകടങ്ങളിൽ നിന്ന് നിങ്ങളെ സംരക്ഷിക്കും. ഓർക്കുക, ആരോഗ്യകരമായ ഒരു ദഹനവ്യവസ്ഥയാണ് ദീർഘായുസ്സിന്റെ അടിസ്ഥാനം.
