ലണ്ടന്: ആഷസ് പരമ്പരയില് ഇംഗ്ലണ്ട് ക്രിക്കറ്റ് ടീമിന്റെ ബാറ്റിംഗ് പരിശീലകനായി ചുമതലയേല്ക്കുന്ന കാര്യം പരിഗണിച്ച് ഓസ്ട്രേലിയന് മുന് ടെസ്റ്റ് താരം മൈക്ക് ഹസി. ഇംഗ്ലണ്ടിന്റെ പുതിയ ടെസ്റ്റ് പരിശീലകനായ സ്റ്റീഫന് ഫ്ളെമിംഗ്, ഹസിയുമായി ഇതുസംബന്ധിച്ച് ചര്ച്ച നടത്തിയതായാണ് റിപ്പോര്ട്ടുകള്.
ചെന്നൈ സൂപ്പര് കിങ്സിലെ ദീര്ഘകാല സഹപ്രവര്ത്തകരും അടുത്ത സുഹൃത്തുക്കളുമായ ഫ്ളെമിംഗും ഹസിയും ക്രിക്കറ്റിലെ ഏറ്റവും വലിയ പോരാട്ടമായ ആഷസില് ഒരുമിച്ച് പ്രവര്ത്തിക്കാനുള്ള സാധ്യതയാണ് ഇപ്പോള് ഉയര്ന്നിരിക്കുന്നത്.
ഇംഗ്ലണ്ടിനൊപ്പം ചേരാനുള്ള സാധ്യത തള്ളിക്കളയാന് താന് ഇപ്പോള് തയ്യാറല്ലെന്ന് ഹസി വ്യക്തമാക്കി. ഏത് രാജ്യത്തെ താരങ്ങളെയും പരിശീലിപ്പിക്കുന്നതില് തനിക്ക് എതിര്പ്പില്ലെന്നും പരിശീലകന്റെ ജോലി ഏറെ ആസ്വദിക്കുന്നുണ്ടെന്നും മുന് ഓസീസ് താരം പറഞ്ഞു.
അതേസമയം, ഓസ്ട്രേലിയക്കെതിരായ ആഷസ് പരമ്പരയില് ഇംഗ്ലണ്ടിന്റെ പരിശീലക സംഘത്തിന്റെ ഭാഗമാകുന്നത് അല്പം വിചിത്രമായ അനുഭവമായിരിക്കുമെന്നും ഹസി സമ്മതിച്ചു. എന്നാല് എതിരാളികള്ക്കെതിരെയല്ല, താന് പരിശീലിപ്പിക്കുന്ന ടീമിന്റെ വിജയത്തിനായാണ് പ്രവര്ത്തിക്കുന്നതെന്ന നിലപാടാണ് അദ്ദേഹത്തിനുള്ളത്.
തീരുമാനം തിടുക്കത്തില് എടുക്കില്ലെന്നും കുടുംബത്തോടൊപ്പം ചെലവഴിക്കേണ്ട സമയത്തിന് വലിയ പ്രാധാന്യമുണ്ടെന്നും ഹസി വ്യക്തമാക്കി. ഫ്ളെമിംഗുമായുള്ള ദീര്ഘകാല സൗഹൃദം അന്തിമ തീരുമാനത്തില് നിര്ണായകമായേക്കുമെന്നാണ് സൂചന.
ബ്രണ്ടന് മെക്കല്ലത്തിന് ശേഷം ഇംഗ്ലണ്ട് ടെസ്റ്റ് ടീമിന്റെ ചുമതലയേറ്റ ഫ്ളെമിംഗ്, ടീമിന്റെ ആക്രമണോത്സുകമായ ശൈലി നിലനിര്ത്തുന്നതിനൊപ്പം കൂടുതല് കൃത്യതയും ആസൂത്രിതമായ സമീപനവും കൊണ്ടുവരാന് ശ്രമിക്കുമെന്നാണ് ഹസിയുടെ വിലയിരുത്തല്.
അടുത്ത വര്ഷം ജൂണ് മുതല് ഓഗസ്റ്റ് വരെയാണ് ഇംഗ്ലണ്ടില് ആഷസ് പരമ്പര നടക്കുന്നത്. 2015ന് ശേഷം സ്വന്തം മണ്ണില് ആഷസ് കിരീടം തിരിച്ചുപിടിക്കുകയാണ് ഇംഗ്ലണ്ടിന്റെ പ്രധാന ലക്ഷ്യം. അതിനിടെ, മുന് ഓസ്ട്രേലിയന് താരമായ മൈക്ക് ഹസി തന്നെ ഇംഗ്ലീഷ് പരിശീലക സംഘത്തിലെത്തിയാല് ആഷസ് പോരാട്ടത്തിന് കൂടുതല് ആവേശം പകരുമെന്നുറപ്പ്.
