മുംബൈ: ആസിഡ് ആക്രമണത്തിനിരയായവരുടെ ഐഡന്റിറ്റി സംരക്ഷിക്കുകയും ഡിജിറ്റൽ ലൈംഗികാതിക്രമങ്ങൾക്ക് ജയിൽശിക്ഷ ഉറപ്പാക്കുകയും ചെയ്യുന്ന വ്യവസ്ഥകൾ ഉൾപ്പെടുത്തി ഭാരതീയ ന്യായസംഹിത (മഹാരാഷ്ട്ര ഭേദഗതി) ബിൽ 2026 നിയമസഭാ കൗൺസിൽ ഐകകണ്ഠ്യേന പാസാക്കി. ബിൽ ഇതിനകം നിയമസഭയും അംഗീകരിച്ചിരുന്നു.
മുഖ്യമന്ത്രി ദേവേന്ദ്ര ഫഡ്നവിസ് കൗൺസിലിൽ അറിയിച്ചു, ബിൽ രാഷ്ട്രപതിയുടെ അംഗീകാരത്തിനായി കേന്ദ്രത്തിലേക്ക് അയക്കും. 2020ലെ ശക്തിബില്ലിലെ ചില വ്യവസ്ഥകൾ കൂടി ചേർത്താണ് പുതിയ ഭേദഗതി കൊണ്ടുവന്നത്. ആസിഡ് ആക്രമണത്തിനിരയായവരുടെ വ്യക്തിത്വം വെളിപ്പെടുത്തുന്നത് ശിക്ഷാർഹമാക്കുന്നതാണ് ഭേദഗതിയിലെ പ്രധാന വ്യവസ്ഥ. നിലവിലുള്ള നിയമത്തിൽ ഇത് ഉൾപ്പെടുത്തിയിരുന്നില്ല.
അതേസമയം, ഇ-മെയിൽ, സോഷ്യൽ മീഡിയ തുടങ്ങിയ ഡിജിറ്റൽ മാർഗങ്ങളിലൂടെ നടക്കുന്ന ലൈംഗികാതിക്രമങ്ങൾക്കും ശിക്ഷ ഉറപ്പാക്കിയിട്ടുണ്ട്. ഇത്തരം കുറ്റങ്ങൾക്ക് മൂന്ന് വർഷം വരെ കഠിനതടവും പിഴയും നൽകുന്നതാണ് ബിൽ നിർദ്ദേശിക്കുന്നത്. ഭാരതീയ ന്യായസംഹിത 2024ൽ നിലവിൽ വന്ന പശ്ചാത്തലത്തിലാണ് ഈ പുതിയ ഭേദഗതി കൊണ്ടുവന്നതെന്നും മുഖ്യമന്ത്രി വ്യക്തമാക്കി.
