കൊല്ലം: കൊല്ലം പുത്തൂരിൽ കെഎസ്ഇബി ജീവനക്കാരൻ ഷോക്കേറ്റ് മരിച്ചു. ചവറ സ്വദേശി അൽത്താഫ് (48) ആണ് മരിച്ചത്. ഇന്ന് വൈകിട്ട് നാല് മണിയോടെയായിരുന്നു അപകടം. ആറ്റുവാശ്ശേരിയിലെ ഒരു വീട്ടിൽ വൈദ്യുതി തടസ്സപ്പെട്ടതിനെ തുടർന്ന് പരിശോധനയ്ക്കായി എത്തിയതായിരുന്നു അൽത്താഫ്. വൈദ്യുതി പോസ്റ്റിൽ നിന്ന് വീട്ടിലേക്കുള്ള സർവീസ് ലൈൻ പൊട്ടിക്കിടക്കുന്നത് പരിഹരിക്കുന്നതിനിടെ ഷോക്കേൽക്കുകയായിരുന്നു. സംഭവം അറിഞ്ഞെത്തിയ ഫയർഫോഴ്‌സ് ജീവനക്കാർ അൽത്താഫിനെ താഴെയിറക്കി ഉടൻ സിപിആർ നൽകി. തുടർന്ന് സമീപത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.