കോഴിക്കോട്: നിപ സ്ഥിരീകരിച്ച 43 വയസുകാരന്റെ പുതിയ പരിശോധനാഫലം നെഗറ്റീവായി. കോഴിക്കോട് മെഡിക്കൽ കോളേജിൽ നടത്തിയ പരിശോധനയിലാണ് രോഗബാധ കണ്ടെത്താനായില്ല. എന്നാൽ, രോഗിയുടെ ആരോഗ്യനിലയിൽ കാര്യമായ മാറ്റമില്ല. അതിനാൽ അദ്ദേഹം ഇപ്പോഴും മെഡിക്കൽ കോളേജിലെ വെന്റിലേറ്ററിൽ ചികിത്സയിലാണ്. ചികിത്സാ പ്രോട്ടോക്കോളിന്റെ ഭാഗമായാണ് വീണ്ടും പരിശോധന നടത്തിയത്. രോഗിയുടെ സ്രവ സാമ്പിൾ കൂടുതൽ പരിശോധനയ്ക്കായി പൂണെയിലെ ലബോറട്ടറിയിലേക്ക് അയക്കും. ഇക്കഴിഞ്ഞ 10-ാം തീയതിയാണ് രാമനാട്ടുകര സ്വദേശിയായ 43 വയസുകാരന് നിപ രോഗം സ്ഥിരീകരിച്ചത്. ആരോഗ്യവകുപ്പ് തുടർനടപടികൾ തുടരുകയാണ്.