ചെന്നൈ: തന്നെ പാര്‍ട്ടി പരിപാടിയില്‍ ക്ഷണിക്കാറില്ലെന്ന് തുറന്നുപറഞ്ഞ് ബിജെപി നേതാവും നടിയുമായ ഖുശ്ബു. ഒരു മാധ്യമപ്രവര്‍ത്തകനുമായി ഖുശ്ബു സംസാരിക്കുന്ന ഫോണ്‍ സംഭാഷണമാണ് പുറത്തുവന്നിരിക്കുന്നത്. സംഭാഷണം പുറത്തുവന്നതോടെ അനുമതിയില്ലാതെ റെക്കോര്‍ഡ് ചെയ്തതിന് മാധ്യമപ്രവര്‍ത്തകനെതിരെ കേസ് നല്‍കാനൊരുങ്ങുകയാണ് ഖുശ്ബു. പാര്‍ട്ടി പരിപാടികളില്‍ ഖുശ്ബുവിനെ കാണാനില്ലല്ലോ എന്ന് മാധ്യമപ്രവര്‍ത്തകന്‍ ചോദിച്ചപ്പോള്‍, തന്നെ പരിപാടികള്‍ക്ക് ക്ഷണിക്കാറില്ലെന്നും, അങ്ങനെ അറിയിച്ചാലും അവസാന നിമിഷമോ മറ്റോ ആകും അറിയിക്കുകയെന്നുമായിരുന്നു ഖുശ്ബു പറഞ്ഞത്. പാര്‍ട്ടിയെ ഏറെ പ്രതിസന്ധിയിലാക്കുന്ന സംഭാഷണം പുറത്തു വന്നതോടെ ഖുശ്ബു വെട്ടിലായിരിക്കുകയാണ്.