ബെംഗളൂരു: പീനിയയിൽ രഹസ്യബന്ധത്തെ ചൊല്ലിയുണ്ടായ സംഘർഷത്തിനിടെ പ്രായപൂർത്തിയാകാത്ത ആൺകുട്ടി രണ്ടുപേരെ കുത്തിക്കൊന്നു. 16-കാരനാണ് സംഭവം നടത്തിയതെന്നാണ് പോലീസ് വ്യക്തമാക്കുന്നത്.
മല്ലഗൗഡയുടെ ഭാര്യ യമുന (36), സഹോദരൻ സുദീപ് (34) എന്നിവരാണ് കൊല്ലപ്പെട്ടത്. മല്ലഗൗഡയ്ക്ക് 16-കാരന്റെ അമ്മയുമായി രഹസ്യബന്ധമുണ്ടെന്നാരോപിച്ച് ഇവർ കഴിഞ്ഞ ദിവസം സ്ത്രീയുടെ വീട്ടിലെത്തി തർക്കമുണ്ടാക്കിയതായാണ് വിവരം.
വഴക്കിനിടെ ഇരുവരും കത്തിയുമായി വീട്ടിനകത്ത് കയറിയതോടെ അമ്മയെ രക്ഷിക്കാനായി 16-കാരൻ കത്തി പിടിച്ചെടുത്ത് ഇരുവരെയും കുത്തുകയായിരുന്നു. യമുനക്കും സുദീപിനും നിരവധി തവണ കുത്തേറ്റതായും, ഇരുവരും സംഭവസ്ഥലത്തുവെച്ചുതന്നെ മരിച്ചതായും പോലീസ് പറഞ്ഞു.
സംഭവത്തിന് പിന്നാലെ 16-കാരൻ വീട്ടിലെ ഒരു മുറിയിൽ പൂട്ടിക്കൊണ്ടിരുന്നു. പോലീസെത്തിയിട്ടും പുറത്തിറങ്ങാൻ തയ്യാറാകാത്ത കുട്ടിയെ ഒടുവിൽ പിതാവിന്റെ ഇടപെടലിൽ പുറത്തിറക്കുകയായിരുന്നു. സംഭവത്തിൽ കേസ് രജിസ്റ്റർ ചെയ്തിട്ടുണ്ടെന്നും അന്വേഷണം തുടരുകയാണെന്നും പോലീസ് അറിയിച്ചു.
