പിഎസ്സി ചെയര്മാന്റെയും അംഗങ്ങളുടെയും പെന്ഷന് തുകയിൽ വൻ വർധന. സര്ക്കാര് ജീവനക്കാരായി ജോലിചെയ്ത ശേഷം പിഎസ്സി അംഗമോ, ചെയര്മാനോ ആകുന്നവര്ക്കാണ് വലിയ തുക പെന്ഷനായി ലഭിക്കുന്നത്. സര്ക്കാര് ജീവനക്കാരായി ജോലി ചെയ്ത കാലഘട്ടം കൂടി കണക്കാക്കി പിഎസ്സി അംഗങ്ങള്ക്ക് പെന്ഷന് നല്കാനാണ് സര്ക്കാര് ഉത്തരവ്.
ഇതിലൂടെ വലിയ ബാധ്യതയാകും സർക്കാരിന് ഉണ്ടാകുക. നിയമപ്രകാരം സര്ക്കാര് ജീവനക്കാര് ആയിരുന്ന ഒരാള് പിഎസ് സി അംഗമായാല് അവര് പിഎസ്-സി പെന്ഷനിലോ, സര്ക്കാര് ജീവനക്കാര്ക്ക് ലഭിക്കുന്ന പെന്ഷനിലോ ഒന്ന് മാത്രമെ തെരഞ്ഞെടുക്കാന് കഴിയുമായിരുന്നുള്ളൂ, ഇതിലാണ് സര്ക്കാര് മാറ്റം വരുത്തിയത്.
ഇനി മുതല് സര്ക്കാര് ജീവനക്കാരായിരുന്നവര് പിഎസ്സി അംഗമായാല് സര്ക്കാര് സര്വ്വീസ് കാലഘട്ടം കൂടി കണക്കാക്കി പെന്ഷന് നല്കും. അവശ്യപ്പെടുന്ന എല്ലാവര്ക്കും ഇത്തരത്തിൽ പെൻഷൻ അനുവദിച്ചു നൽകാനാണ് സർക്കാർ ഉത്തരവ്. കഴിഞ്ഞ മന്ത്രിസഭായ യോഗത്തിലാണ് സര്ക്കാരിന്റെ പുതിയ തീരുമാനം.
