ന്യൂഡൽഹി: പഹൽഗാം ഭീകരാക്രമണത്തിന് മറുപടിയായി ഇന്ത്യൻ സായുധ സേന ഓപ്പറേഷൻ സിന്ദൂർ വിജയകരമായി നടപ്പാക്കിയതിനു ശേഷം എല്ലാ സംസ്ഥാനങ്ങളിലെയും മുഖ്യമന്ത്രിമാരെയും കാണാനൊരുങ്ങി പ്രധാനമന്ത്രി നരേന്ദ്രമോദി. ഓപ്പറേഷൻ സിന്ദൂറിന് ശേഷം മുഖ്യമന്ത്രിമാരുമായുള്ള ആദ്യകൂടിക്കാഴ്ച കൂടിയാണിത്. ‘വിക്ഷിത് രാജ്യ ഫോർ വിക്ഷിത് ഭാരത്@2047’ എന്ന പ്രമേയത്തിൽ നടക്കുന്ന യോഗം, സഹകരണ ഫെഡറലിസം വളർത്തിയെടുക്കുന്നതിനും സ്വാതന്ത്ര്യത്തിന്റെ 100-ാം വർഷത്തോടെ ഇന്ത്യയെ ഒരു വികസിത രാജ്യമാക്കുക എന്ന ദേശീയ ലക്ഷ്യത്തോട് കൂടിയുള്ളതാണെന്നും റിപ്പോർട്ടുകളും ഉണ്ട്.
കൂടാതെ സംരംഭകത്വ പ്രോത്സാഹനം, മെച്ചപ്പെട്ട വൈദഗ്ധ്യം, സുസ്ഥിര തൊഴിലവസരങ്ങൾ സൃഷ്ടിക്കൽ തുടങ്ങിയ വിഷയങ്ങളും യോഗത്തിൽ ചർച്ച ചെയ്യും എന്ന അടുത്ത വൃത്തങ്ങൾ അറിയിച്ചിട്ടുണ്ട് . കൂടാതെ 2025-26 ബജറ്റിലെ മുൻകൈകളും നിലവിലുള്ള സാമ്പത്തിക വെല്ലുവിളികളും ചർച്ചകളിൽ ഉൾപ്പെടാൻ സാധ്യതയുണ്ടെന്ന് ഒരു മുതിർന്ന സർക്കാർ ഉദ്യോഗസ്ഥൻ അഭിപ്രായപ്പെട്ടു. അതേസമയം കഴിഞ്ഞ വർഷം ജൂലൈ 27 ന് നടന്ന യോഗത്തിൽ 10 സംസ്ഥാനങ്ങളും കേന്ദ്രഭരണ പ്രദേശങ്ങളും പങ്കെടുത്തില്ല എന്നത് ശ്രദ്ധേയമാണ്.
