തിരുവനന്തപുരം: സംസ്ഥാനത്ത് കോവിഡ് കേസ് വർദ്ധിച്ച് വരുന്ന സാഹചര്യത്തിൽ നിരീക്ഷണം ശക്തമാക്കണമെന്ന് ആരോഗ്യ മന്ത്രി വീണാ ജോര്ജ്. സംസ്ഥാനത്ത് മെയ് മാസത്തിൽ 273 കേസുകളാണ് റിപ്പോർട്ട് ചെയ്തിരിക്കുന്നത്. കോട്ടയം ജില്ലയില് 82, തിരുവനന്തപുരം 73, എറണാകുളം 49, പത്തനംതിട്ട 30, തൃശൂര് 26 എന്നിങ്ങനെയാണ് ഈ മാസത്തില് ഇതുവരെ റിപ്പോര്ട്ട് ചെയ്തിട്ടുള്ള കേസുകൾ. കോട്ടയം, തിരുവനന്തപുരം ജില്ലകളിലാണ് കേസുകൾ കൂടുതൽ റിപ്പോർട്ട് ചെയ്തിരിക്കുന്നത്.
അതേസമയം കോവിഡിന് സ്വയം പ്രതിരോധം പ്രധാനമാണ്. ജലദോഷം, തൊണ്ടവേദന, ചുമ, ശ്വാസതടസം തുടങ്ങിയ രോഗലക്ഷണങ്ങള് ഉള്ളവര് നിര്ബന്ധമായും മാസ്ക് ധരിക്കണം. പ്രായമായവരും, ഗര്ഭിണികളും, ഗുരുതര രോഗമുള്ളവരും പൊതുയിടങ്ങളിലും യാത്രകളിലും മാസ്ക് ധരിക്കണം . കൂടാതെ കേസുകൾ വർധിക്കുന്ന സാഹചര്യത്തിൽ പ്രവര്ത്തനങ്ങള് ഏകോപിപ്പിക്കണമെന്നും ജില്ലകള് കൃത്യമായി കോവിഡ് കേസുകള് റിപ്പോര്ട്ട് ചെയ്യണമെന്നും മന്ത്രി നിര്ദേശം നല്കി.
