കോട്ടയം: യുവാവിനെ കാറിൽ മരിച്ച നിലയിൽ കണ്ടെത്തി. മണര്കാട് ബാറിന്റെ പാര്ക്കിങ് ഗ്രൗണ്ടില് നിർത്തിയിട്ടിരുന്ന കാറിലാണ് യുവാവിനെ മരിച്ചനിലയില് കണ്ടെത്തിയത്. മണര്കാട് സ്വദേശിയായ ശങ്കരശേരില് മാന്തറപ്പറമ്പില് എം.വി മഹേഷി (42) നെയാണ് കാറിനുള്ളില് മരിച്ചനിലയില് കണ്ടെത്തിയത്.
മണര്കാട്ടെ ബാറിന്റെ പാര്ക്കിങ് ഏരിയയില് തിങ്കളാഴ്ച വൈകുന്നേരം 4.30-ഓടെയാണ് മരിച്ചനിലയില് മഹേഷിനെ കണ്ടെത്തിയത്. ബാറില്നിന്ന് പുറത്തെത്തിയശേഷം വിശ്രമിക്കുന്നതിനായിരുന്നു മഹേഷ് കാറില് കയറിയത്. ജീവനക്കാര് എത്തി പരിശോധിച്ചപ്പോഴാണ് അബോധാവസ്ഥയില് കണ്ടെത്തിയത്.
മണര്കാട് പോലീസ് സ്ഥലത്തെത്തിയാണ് മഹേഷിനെ കാറില്നിന്ന് പുറത്തെടുത്ത് മണര്കാട് സ്വകാര്യ ആശുപത്രിയില് എത്തിച്ചത്. എന്നാല് ആശുപത്രിയിൽ എത്തുന്നതിനു മുന്നേ മരണം സംഭവിച്ചിരുന്നു. പോലീസ് അസ്വാഭാവിക മരണത്തിന് കേസെടുത്തു.
