കോട്ടയം: തലപ്പാറ കൊങ്ങിണി മുക്കിൽ ഉണ്ടായ കാറും ലോറിയും തമ്മിലുള്ള ഗുരുതര അപകടത്തിൽ രണ്ടു യുവാക്കൾക്ക് ദാരുണാന്ത്യം. കരിപ്പാടം ദാറു സുബഹ് വീട്ടിൽ ടി.എം. റഷീദിന്റെ മകൻ മുർത്തസ അലിൻ റഷീദ്, വൈക്കം പുളിംതുരുത്ത് അബുവിന്റെ മകൻ റിദിക് മുഹമ്മദ് എന്നിവരാണ് മരിച്ചത്. കാറിലുണ്ടായിരുന്ന മറ്റൊരു യുവാവ് ഗുരുതര പരിക്കുകളോടെ ആശുപത്രിയിൽ പ്രവേശിപ്പിച്ചിരിക്കുകയാണ്.

ഇന്നലെ രാത്രി 12 മണിയോടെയാണ് അപകടം നടന്നത്. എറണാകുളത്തു നിന്ന് കോട്ടയത്തേക്കുള്ള റഫ്രിജറേറ്റർ ലോറിയും എതിര്‍വശത്തുനിന്ന് വന്ന കാറുമാണ് കൂട്ടിയിടിച്ചത്. ഇടിയുടെ ആഘാതത്തിൽ കാർ പൂർണമായും തകർന്നു. ലോറിയുടെ മുൻഭാഗവും കേടായതായി അധികൃതർ അറിയിച്ചു. അപകടസമയത്ത് റിദിക് മുഹമ്മദിന്റെ വീട്ടിൽ നിന്ന് വെട്ടിക്കാട്ടുമുക്കിലുള്ള മുർത്തസയുടെ സ്ഥാപനത്തിലേക്ക് പോകുന്നതിനിടെയായിരുന്നു യാത്ര. വിദേശത്ത് ജോലി ചെയ്തിരുന്ന റിദിക് ഒരു മാസം മുൻപ് നാട്ടിലേക്ക് തിരിച്ച് വന്നതായിരുന്നു. ഇരുവരും അവിവാഹിതരായിരുന്നു. അപകടത്തെ തുടർന്ന് തലയോലപ്പറമ്പ് – എറണാകുളം റൂട്ടിൽ മണിക്കൂറുകളോളം ഗതാഗതം തടസപ്പെട്ടു. പിന്നീട് പൊലീസ് എത്തിയ ശേഷമാണ് ഗതാഗതം പുനസ്ഥാപിച്ചത്.