മുംബൈ: ഓടുന്ന ട്രെയിനിൽ നിന്ന് യാത്രക്കാർ നദിയിലേക്ക് വലിച്ചെറിഞ്ഞത് തേങ്ങ തലയിൽ തേങ്ങ വീണ് 30 കാരന് ദാരുണാന്ത്യം. വസായി പഞ്ജു ദ്വീപ് സ്വദേശിയായ സഞ്ജയ് ബോർ ആണ് മരിച്ചത് .
ശനിയാഴ്ച രാവിലെ 8.30ഓടെയാണ് സംഭവം നടന്നത്. നൈഗോൺ റെയിൽവേ സ്റ്റേഷനിലേക്കു നടന്നുപോകുകയായിരുന്ന സഞ്ജയുടെ തലയിൽ, നൈഗോൺ–ഭയന്ദർ പാലത്തിന് സമീപം ട്രെയിനിൽ നിന്ന് എറിഞ്ഞ തേങ്ങ പതിച്ചു.
കുഴഞ്ഞുവീണ യുവാവിനെ ആദ്യം വസായിയിലെ സർ ഡിഎം പെറ്റിറ്റ് ആശുപത്രിയിൽ പ്രവേശിപ്പിച്ചു. ഗുരുതരാവസ്ഥ കാരണം തുടർന്ന് മുംബൈയിലെ സ്വകാര്യ ആശുപത്രിയിലേക്ക് മാറ്റിയെങ്കിലും ജീവൻ രക്ഷിക്കാനായില്ല. സംഭവത്തിൽ യാത്രക്കാരനെ തിരിച്ചറിയാനുള്ള ശ്രമം പൊലീസ് തുടങ്ങി. അപകടമരണത്തിന് കേസ് രജിസ്റ്റർ ചെയ്തിട്ടുണ്ട്.
ഈ മേഖലയിലിതു ആദ്യമായല്ല ഇത്തരത്തിൽ അപകടം സംഭവിക്കുന്നത്. പൂജ ചെയ്ത തേങ്ങ, പ്ലാസ്റ്റിക് കവറുകളിൽ പൊതിഞ്ഞ വിഗ്രഹങ്ങൾ, മറ്റ് വസ്തുക്കൾ തുടങ്ങിയവ യാത്രക്കാർ പതിവായി ട്രെയിനുകളിൽ നിന്ന് നദിയിലേക്ക് എറിയാറുണ്ട്. ഇത്തരം അശ്രദ്ധ പ്രവർത്തനങ്ങൾ മൂലം മുമ്പും ദ്വീപ് നിവാസികൾക്ക് പരിക്കേറ്റ സംഭവങ്ങൾ ഉണ്ടായിട്ടുണ്ട്.
