വാഷിങ്ടന്: അമേരിക്കയ്ക്ക് പുറത്ത് നിര്മിക്കുന്ന എല്ലാ സിനിമകള്ക്കും 100% തീരുവ ഏര്പ്പെടുത്തുമെന്ന് യുഎസ് പ്രസിഡന്റ് ഡോണള്ഡ് ട്രംപ്. തന്റെ സോഷ്യല് മീഡിയ പ്ലാറ്റ്ഫോമായ ‘ട്രൂത്ത് സോഷ്യലി’ലൂടെയാണ് അദ്ദേഹം ഇക്കാര്യം അറിയിച്ചത്. സിനിമ ആദ്യമുണ്ടായത് അമേരിക്കയിലാണെന്നും മറ്റ് രാജ്യങ്ങള് ആത് അനുകരിച്ചുവെന്നുമാണ് ട്രംപ് ട്രൂത്ത് സോഷ്യലില് കുറിച്ചത്.
ഒരു കുട്ടിയുടെ കയ്യില് നിന്ന് മിഠായി മോഷ്ടിക്കുന്നതുപോലെ, മറ്റ് രാജ്യങ്ങള് നമ്മുടെ സിനിമാ വ്യവസായത്തെ അമേരിക്കന് ഐക്യനാടുകളില് നിന്ന് മോഷ്ടിച്ചിരിക്കുന്നു. പ്രത്യേകിച്ച്, ദുര്ബലനും കഴിവുകെട്ടവനുമായ ഒരു ഗവര്ണറുള്ള കാലിഫോര്ണിയെയാണ് ഇത് കൂടുതല് ബാധിച്ചിരിക്കുന്നത്. അതിനാല്, ഈ പ്രശ്നം പരിഹരിക്കുന്നതിനായി, യുഎസിനു പുറത്ത് നിര്മിക്കുന്ന എല്ലാ സിനിമകള്ക്കും ഞാന് 100 ശതമാനം തീരുവ ചുമത്തും” ട്രംപ് ട്രൂത്ത് സോഷ്യലില് കുറിച്ചു.
അതേസമയം ഇന്ത്യന് സിനിമകളുടെ വിദേശ ബോക്സ് ഓഫിസിന്റെ ഏകദേശം 35 മുതല് 40 ശതമാനം വരെ സംഭാവന ചെയ്യുന്നത് യുഎസ് ആണ്. ട്രംപിന്റെ തീരുമാനം ബോളിവുഡിനും ഇന്ത്യയിലെ പ്രാദേശിക സിനിമ വ്യവസായത്തിനും വലിയ രീതിയില് പ്രത്യാഘാതം സൃഷ്ടിക്കും.
