കൊല്ലം: പൊരീക്കലിൽ ലഹരി വിൽപ്പന സംഘങ്ങൾ തമ്മിലുണ്ടായ സംഘർഷത്തിൽ യുവാവ് മരിച്ചു. ഇടവട്ടം ഗോകുലത്തിൽ ഗോകുൽനാഥ് (35) ആണ് മരിച്ചത്. ഇന്നലെ രാത്രി പതിനൊന്നോടെയായിരുന്നു സംഭവം. ഇടവട്ടം ജയന്തി നഗറിലാണ് ഏറ്റുമുട്ടൽ ഉണ്ടായത്. സംഭവവുമായി ബന്ധപ്പെട്ട് ജയന്തി നഗർ അരുൺ ഭവനിൽ താമസിക്കുന്ന അരുൺ ഒളിവിൽ പോകുകയായിരുന്നു. ഇരുവരും കഞ്ചാവ് വിൽപ്പനയിൽ സജീവമായിരുന്ന സംഘത്തിലെ അംഗങ്ങളാണെന്ന് പൊലീസ് അറിയിച്ചു.
ജയന്തി നഗർ സ്വദേശി ജോസിന്റെ വീട്ടുമുന്നിലായിരുന്നു ഏറ്റുമുട്ടൽ നടന്നത്. അലർച്ച കേട്ട് പുറത്തേക്ക് വന്ന അയൽവാസികളാണ് ഗോകുലിനെ അവശനിലയിൽ കാണുന്നത്. “എനിക്ക് വയ്യ, എന്നെ ആശുപത്രിയിൽ കൊണ്ടുപോകണം” എന്നാണ് ഗോകുൽ പിന്നീട് പറഞ്ഞത് എന്നാണ് ദൃക്സാക്ഷികൾ പറയുന്നത്. അരുണും കൂടി ചേർന്ന് ഗോകുലിനെ കൊട്ടാരക്കര താലൂക്ക് ആശുപത്രിയിൽ എത്തിച്ചെങ്കിലും, അവിടെ നിന്ന് ഉടനെ ഇയാൾ മുങ്ങുകയായിരുന്നു. പരേതനായ രഘുനാഥൻ പിള്ളയുടെ മകനാണ് ഗോകുലനാഥ്. പോലീസ് അന്വേഷണം തുടരുകയാണ്. പ്രതിയായ അരുൺ ഒരു ലഹരി സംഘത്തിൽ സജീവമായ വ്യക്തിയാണെന്ന് സ്ഥിരീകരിച്ചിട്ടുണ്ട്. അയാളെ പിടികൂടാൻ പ്രത്യേക സംഘം തിരച്ചിൽ ശക്തമാക്കിയിട്ടുണ്ട്.
