കോട്ടയം: കോട്ടയം ജില്ലാ പഞ്ചായത്തിൽ മുസ്ലീം ലീഗിന് (ഐ.യു.എം.എൽ) ആദ്യമായി മത്സരിക്കാൻ സീറ്റ് നൽകാൻ യുഡിഎഫ് (ഐക്യ ജനാധിപത്യ മുന്നണി) തീരുമാനിച്ചു. യുഡിഎഫ് കോട്ടയം ജില്ലാ നേതൃയോഗത്തിലാണ് ചരിത്രപരമായ ഈ തീരുമാനം എടുത്തത്. ഇതാദ്യമായാണ് കോട്ടയം ജില്ലാ പഞ്ചായത്തിൽ ലീഗിന് മത്സരിക്കാൻ അവസരം ലഭിക്കുന്നത്. ഇതിനായി ലീഗ് നേതൃത്വം ശക്തമായ സമ്മർദ്ദം ചെലുത്തിയിരുന്നു. ആകെ 23 സീറ്റുകളുള്ള ജില്ലാ പഞ്ചായത്തിൽ സീറ്റ് വിഭജനം ഇങ്ങനെയാണ്; കോൺഗ്രസിന് 14 സീറ്റുകൾ, കേരള കോൺഗ്രസ് (ജോസഫ്) വിഭാഗത്തിന് 8 സീറ്റുകൾ, മുസ്ലീം ലീഗിന് 1 സീറ്റ്. ലീഗ് മത്സരിക്കുന്ന സീറ്റ് ഏതാണെന്നുള്ള അന്തിമ പ്രഖ്യാപനം അടുത്ത രണ്ട് ദിവസത്തിനുള്ളിൽ ഉണ്ടാകുമെന്നും യുഡിഎഫ് നേതൃത്വം അറിയിച്ചു.