കോഴിക്കോട്: നാദാപുരം പുറമേരിയിൽ റോഡിൽ സ്ഫോടനം ഉണ്ടായതായി റിപ്പോർട്ട്. അറാംവെള്ളിക്ക് സമീപം സ്കൂൾ ബസ് കടന്നുപോയതിന് തൊട്ടുപിന്നാലെയായിരുന്നു സ്ഫോടനം. ബസിന്റെ ടയർ റോഡിലൂടെ കയറിയ ഉടനെ സ്ഫോടക വസ്തു പൊട്ടിത്തെറിക്കുകയായിരുന്നു.
ഉഗ്രശബ്ദം കേട്ടതിനെ തുടർന്ന് ഡ്രൈവർ വാഹനം നിർത്തി പരിശോധിച്ചപ്പോഴാണ് സ്ഫോടനം നടന്നതായി വ്യക്തമായത്. വിദ്യാർത്ഥികളെ സുരക്ഷിതമായി സ്കൂളിൽ എത്തിച്ച ശേഷമാണ് ഡ്രൈവർ സംഭവം പോലീസിനെ അറിയിച്ചത്.
വിവരം ലഭിച്ചതിനെ തുടർന്ന് നാദാപുരം പൊലീസ് സ്ഥലത്തെത്തി പരിശോധന നടത്തി. റോഡിൽ നിന്ന് സ്ഫോടക വസ്തുവിന്റെ അവശിഷ്ടങ്ങൾ കണ്ടെത്തിയിട്ടുണ്ട്. സംഭവത്തിൽ അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.
