കോട്ടയം: കേരളത്തിലെ സഹകരണ ബാങ്കുകളിലെ പ്രതിസന്ധി പരിഹരിക്കണമെന്നും നിക്ഷേപകരുടെ പണം തിരികെ നൽകണമെന്നും ആവശ്യപ്പെട്ട് ഓൾ കേരള കോ-ഓപ്പറേറ്റീവ് ഡെപ്പോസിറ്റേഴ്സ് ഫോറം (AKCDF) കോട്ടയം ജില്ലാ കമ്മിറ്റിയുടെ നേതൃത്വത്തിൽ ഫെബ്രുവരി 5-ന് (വ്യാഴാഴ്ച) പ്രതിഷേധ പരിപാടികൾ സംഘടിപ്പിക്കുന്നു. രാവിലെ 11-ന് കോട്ടയം കളക്ടറേറ്റിന് മുൻപിൽ ധർണ്ണയും അതിന് മുന്നോടിയായി പ്രതിഷേധ വാഹനറാലിയും നടക്കും.
സംസ്ഥാനത്തെ പത്തു ശതമാനത്തോളം വരുന്ന സഹകരണ ബാങ്കുകൾ ഗുരുതരമായ സാമ്പത്തിക പ്രതിസന്ധി നേരിടുകയാണെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു. നിക്ഷേപം അടിയന്തര ആവശ്യങ്ങൾക്ക് പോലും തിരികെ ലഭിക്കാതെയും പ്രതിമാസ പലിശ മുടങ്ങിയുമാണ് നിക്ഷേപകർ വലയുന്നത്. ഇതിൽ ഭൂരിഭാഗവും മുതിർന്ന പൗരന്മാരാണ്. സർക്കാർ പ്രഖ്യാപിച്ച ഡെപ്പോസിറ്റ് ഗ്യാരണ്ടി പദ്ധതി വിശ്വസിച്ചാണ് പലരും പണം നിക്ഷേപിച്ചത്. എന്നാൽ ഈ ഗ്യാരണ്ടി ഫലപ്രദമാകുന്നില്ലെന്നും നിക്ഷേപകരെ വഞ്ചിക്കുന്ന സമീപനമാണ് സർക്കാർ സ്വീകരിക്കുന്നതെന്നും ഫോറം കുറ്റപ്പെടുത്തി.
വ്യാജ വായ്പകൾ, ബിനാമി ഇടപാടുകൾ, സ്വത്തിന്റെ അമിത മൂല്യനിർണ്ണയം എന്നിവയിലൂടെ ബാങ്കുകളിൽ വലിയ തോതിലുള്ള അഴിമതിയാണ് നടന്നിരിക്കുന്നത്. 1,658 കോടി രൂപയുടെ വെട്ടിപ്പ് നടന്നതായി മന്ത്രി തന്നെ പ്രസ്താവന നടത്തിയിട്ടുണ്ട്. സഹകരണ വകുപ്പിലെ അഴിമതിക്കാരായ ഉദ്യോഗസ്ഥർക്കും ബാങ്ക് ഭരണസമിതികൾക്കുമെതിരെ നടപടിയെടുക്കാൻ പോലീസ് തയ്യാറാകുന്നില്ലെന്നും ഭാരവാഹികൾ പറഞ്ഞു. കാലാവധി കഴിഞ്ഞ നിക്ഷേപങ്ങൾ പോലും നൽകാൻ കഴിയാത്ത സാഹചര്യത്തിലും സർക്കാർ ‘നിക്ഷേപ സമാഹരണ പരിപാടി’ സ്പോൺസർ ചെയ്യുന്നത് ജനങ്ങളെ കബളിപ്പിക്കലാണെന്നും അവർ കൂട്ടിച്ചേർത്തു.
പ്രതിഷേധ പരിപാടികൾ:
- രാവിലെ 10:00: ഏറ്റുമാനൂരിലുള്ള മന്ത്രി വി.എൻ. വാസവന്റെ ഓഫീസിന് സമീപത്തുനിന്ന് വാഹന പ്രതിഷേധ റാലി ആരംഭിക്കും.
- രാവിലെ 11:00: കോട്ടയം കളക്ടറേറ്റിന് മുന്നിൽ ധർണ്ണ.
നിക്ഷേപം തിരികെ കിട്ടാതെ ബുദ്ധിമുട്ടുന്ന ജില്ലയിലെ മുഴുവൻ നിക്ഷേപകരും പ്രതിഷേധത്തിൽ പങ്കെടുക്കണമെന്ന് എ.കെ.സി.ഡി.എഫ് സംസ്ഥാന വൈസ് പ്രസിഡന്റുമാരായ റോയി വെള്ളരിങ്ങാട്ട്, പ്രൊഫ. നെടുങ്കുന്നം രഘുദേവ്, ജില്ലാ പ്രസിഡന്റ് എ.സി. ബേബിച്ചൻ, ട്രഷറർ ജൂലിയസ് രാമപുരം, ജോർജ് വെള്ളൂർ എന്നിവർ അറിയിച്ചു.
