തിരുവനന്തപുരം: നിയമസഭാ തിരഞ്ഞെടുപ്പിൽ തളിപ്പറമ്പ് മണ്ഡലത്തിൽ സി.പി.എം സ്ഥാനാർഥിയായി പി.കെ. ശ്യാമളയെ രംഗത്തിറക്കാൻ സംസ്ഥാന നേതൃത്വത്തിന്റെ തീരുമാനം. സി.പി.എം സംസ്ഥാന സെക്രട്ടറിയും സിറ്റിങ് എം.എൽ.എയുമായ എം.വി. ഗോവിന്ദന്റെ ഭാര്യയും മഹിളാ അസോസിയേഷൻ നേതാവുമായ ശ്യാമളയാണ് മത്സരിക്കുക എന്ന വിവരം ഇന്ന് ചേർന്ന സംസ്ഥാന സെക്രട്ടേറിയറ്റ് യോഗത്തിന് പിന്നാലെ പുറത്തുവന്നു.
കണ്ണൂർ ജില്ലയിൽ നിന്ന് തയ്യാറാക്കിയ സ്ഥാനാർഥി പട്ടികയിൽ പി.കെ. ശ്യാമളയെ ഉൾപ്പെടുത്തിയതിനെ ജില്ലാ സെക്രട്ടേറിയറ്റ് യോഗം നേരത്തെ അംഗീകരിച്ചിരുന്നു. ഇതോടെയാണ് സംസ്ഥാന സെക്രട്ടേറിയറ്റും കാര്യത്തിൽ അന്തിമതീരുമാനം എടുത്തത്. സ്ഥാനാർഥി പട്ടിക നാളെ ചേരുന്ന സംസ്ഥാന കമ്മിറ്റിയുടെ പരിഗണനയ്ക്കായി സമർപ്പിക്കും.
അതേസമയം, ശ്യാമളയുടെ സ്ഥാനാർഥിത്വവുമായി ബന്ധപ്പെട്ട് പാർട്ടി പ്രവർത്തകരിൽ ചിലർ എതിർപ്പ് പ്രകടിപ്പിച്ചിരുന്നു. സോഷ്യൽ മീഡിയയിലും വിമർശനങ്ങൾ ഉയർന്നിരുന്നു. എന്നാൽ ഇത്തരം പ്രതികരണങ്ങളെ അവഗണിച്ചാണ് നേതൃത്വം മുന്നോട്ട് പോകാൻ തീരുമാനിച്ചത്. മണ്ഡലത്തിൽ വനിതാ സ്ഥാനാർഥിയെ അവതരിപ്പിക്കണമെന്ന നിലപാട് തുടക്കത്തിൽ തന്നെ ഉയർത്തി സീറ്റ് സുരക്ഷിതമാക്കാനുള്ള നീക്കമാണിതെന്ന വിമർശനവും ഉണ്ടായി.
പി.കെ. ശ്യാമളയ്ക്കൊപ്പം എൻ. സുകന്യയുടെ പേരും ചർച്ചകളിൽ ഉണ്ടായിരുന്നുവെന്നാണ് വിവരം. മഹിളാ അസോസിയേഷൻ നേതാവായ സുകന്യ, രണ്ടുതവണ തളിപ്പറമ്പിനെ പ്രതിനിധീകരിച്ച ജെയിംസ് മാത്യുവിന്റെ ഭാര്യയുമാണ്. എന്നാൽ അവസാനം പാർട്ടി ശ്യാമളയുടെ പേരിലാണ് ഏകോപനം നേടിയിരിക്കുന്നത്.
