ധാക്ക: ആൻഡമാൻ കടലിൽ റോഹിംഗ്യൻ അഭയാർഥികളും ബംഗ്ലാദേശ് പൗരന്മാരും ഉൾപ്പെടെ ഏകദേശം 250 പേർ സഞ്ചരിച്ചിരുന്ന ബോട്ട് മുങ്ങിയതായി റിപ്പോർട്ട്. മലേഷ്യയിലേക്ക് പോകുന്നതിനിടെ ഉണ്ടായ അപകടത്തിൽ നിരവധി പേരെ കാണാതായിട്ടുണ്ട്.
ബംഗ്ലാദേശിലെ കോക്സ് ബസാറിലെ ടെക്നാഫിൽ നിന്ന് പുറപ്പെട്ട ബോട്ടാണ് ദുരന്തത്തിൽപ്പെട്ടത്. ഐക്യരാഷ്ട്രസഭയുടെ അഭയാർഥി ഏജൻസിയും ഇന്റർനാഷണൽ ഓർഗനൈസേഷൻ ഫോർ മൈഗ്രേഷനും സംയുക്ത പ്രസ്താവനയിൽ സംഭവം സ്ഥിരീകരിച്ചു. ബോട്ടിൽ അനിയന്ത്രിതമായ തിരക്ക്, ശക്തമായ കാറ്റ്, പ്രക്ഷുബ്ധമായ കടൽ എന്നിവയാണ് അപകടത്തിന് കാരണമായതെന്ന് അവർ വ്യക്തമാക്കി.
മ്യാൻമറിലെ റാഖൈൻ സംസ്ഥാനത്ത് തുടരുന്ന സംഘർഷവും സുരക്ഷിതമായ മടങ്ങിവരവിന്റെ അഭാവവും റോഹിംഗ്യൻ അഭയാർഥികളെ ഇത്തരം അപകടകരമായ കടൽ യാത്രകളിലേക്ക് തള്ളിവിടുന്നുവെന്നാണ് ഏജൻസികളുടെ വിലയിരുത്തൽ. അഭയാർഥി ക്യാമ്പുകളിലെ പരിമിതമായ സൗകര്യങ്ങളും തൊഴിലവസരങ്ങളില്ലായ്മയും ഇവരെ വിദേശരാജ്യങ്ങളിലേക്ക് പോകാൻ പ്രേരിപ്പിക്കുന്നു.
ലോകത്തിലെ ഏറ്റവും വലിയ അഭയാർഥി ക്യാമ്പായ കോക്സ് ബസാറിലാണ് ഒരു ദശലക്ഷത്തിലധികം റോഹിംഗ്യകൾ കഴിയുന്നത്. ഈ ദുരന്തം റോഹിംഗ്യ പ്രശ്നത്തിന് സ്ഥിരമായ പരിഹാരം കണ്ടെത്തേണ്ടതിന്റെ ആവശ്യകത വീണ്ടും ഉയർത്തിക്കാട്ടുന്നതായി യുഎൻ ഏജൻസികൾ വ്യക്തമാക്കി. റോഹിംഗ്യൻ അഭയാർഥികളുടെ സംരക്ഷണത്തിനായി അന്താരാഷ്ട്ര പിന്തുണ ശക്തിപ്പെടുത്തണമെന്നും അവർ അഭ്യർത്ഥിച്ചു.
