കൊല്ലം: ആത്മഹത്യക്ക് ശ്രമിച്ച യുവാവിനെ രക്ഷപ്പെടുത്തി പൊലീസ്. കൊട്ടാരക്കര വെള്ളിയാഴ്ച വൈകിട്ട് മൂന്നരയോടെയാണ് സംഭവം നടന്നത്. 40കാരൻ കിടപ്പുമുറിയിലെ ഫാനിൽ തൂങ്ങി ജീവനൊടുക്കാൻ ശ്രമിക്കുകയാണെന്ന വിവരം പൊലീസിന് ലഭിച്ചതിനെ തുടർന്ന് പട്രോളിംഗ് സംഘമെത്തി. ഉടൻ സ്ഥലത്തെത്തി വാതിൽ ചവിട്ടി തുറന്നപ്പോൾ യുവാവ് കയറിൽ തൂങ്ങി കിടക്കുന്നതാണ് കണ്ടത്.

മിന്നൽ വേഗത്തിൽ പ്രവർത്തിച്ച പൊലീസ് ഉദ്യോഗസ്ഥർ യുവാവിനെ ഉയർത്തിപ്പിടിച്ച് കഴുത്തിലെ കുരുക്ക് അഴിച്ച് പുറത്തേക്ക് കൊണ്ടുവന്നു. തുടർന്ന് ഉടൻ തന്നെ ആശുപത്രിയിലേക്ക് മാറ്റി ജീവൻ രക്ഷിച്ചു. സംഭവത്തിൽ പങ്കജ് കൃഷ്ണയും സിപിഒ കിരൺയും നിർണായക പങ്കുവഹിച്ചു. യുവാവിന്റെ ആരോഗ്യനില മെച്ചപ്പെട്ടുവരുന്നതായും അദ്ദേഹത്തിന് കൗൺസിലിംഗ് നൽകുമെന്നും പൊലീസ് അറിയിച്ചു.