പാലക്കാട്:കിണർ വൃത്തിയാക്കാനായി ഇറങ്ങിയ യുവാവ് സ്ലാബ് തകർന്നു വീണുണ്ടായ അപകടത്തിൽ മരിച്ചു. ചെത്തല്ലൂർ കൊട്ടിലിങ്ങൽ അബ്ദുൽ ജബ്ബാറിന്റെ മകൻ റിയാസ് (35) ആണ് ദാരുണമായി മരണപ്പെട്ടത്. വ്യാഴാഴ്ച രാവിലെ പൂവ്വത്താണിയിലെ അരിക്കാട്ടുപറമ്പിൽ ഷമീറിന്റെ വീടിന്റെ കിണറ്റിലാണ് അപകടം നടന്നത്. കഴിഞ്ഞ ദിവസം തന്നെ കിണർ വൃത്തിയാക്കുന്ന ജോലികൾ ആരംഭിച്ചിരുന്നെങ്കിലും പണി പൂർത്തിയാകാത്തതിനെ തുടർന്ന് ബാക്കി ജോലികൾക്കായി ഇന്ന് രാവിലെ വീണ്ടും കിണറ്റിൽ ഇറങ്ങിയപ്പോഴാണ് അപ്രതീക്ഷിതമായി മുകളിൽ നിന്ന് സ്ലാബ് പൊട്ടിവീണത്.

അപകടം നടന്ന ഉടനെ തന്നെ സ്ഥലത്തുണ്ടായിരുന്നവരും നാട്ടുകാരും ചേർന്ന് രക്ഷാപ്രവർത്തനം നടത്തുകയും റിയാസിനെ പുറത്തെടുത്ത് പെരിന്തൽമണ്ണയിലെ സ്വകാര്യ ആശുപത്രിയിൽ എത്തിക്കുകയും ചെയ്തെങ്കിലും ജീവൻ രക്ഷിക്കാനായില്ല. സ്ലാബ് വീണുണ്ടായ ഗുരുതരമായ പരിക്കാണ് മരണകാരണമെന്നാണ് പ്രാഥമിക നിഗമനം. മൃതദേഹം ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. നടപടിക്രമങ്ങൾ പൂർത്തിയാക്കിയ ശേഷം ബന്ധുക്കൾക്ക് വിട്ടുനൽകും. ഒട്ടും പ്രതീക്ഷിക്കാത്ത നേരത്തുണ്ടായ അപകടത്തിന്റെ ആഘാതത്തിലാണ് റിയാസിന്റെ കുടുംബവും നാടും.