ന്യൂയോര്‍ക്ക്: ആപ്പിളിന്റെ അടുത്ത മോഡലിന്റെ ലോഞ്ച് വരും മാസങ്ങളിൽ നടക്കാനിരിക്കെ, വരാനിരിക്കുന്ന ഐഫോൺ 18 പ്രോ മാക്സിനെക്കുറിച്ചുള്ള പുതിയ വിവരങ്ങളാണ് ചർച്ചയാകുന്നത്. ഐഫോൺ 17 പ്രോ മാക്സ് വിപണിയിലെ ഏറ്റവും പ്രീമിയം ഫോണുകളിലൊന്നായി തുടരുമ്പോഴും, അടുത്ത തലമുറ പ്രോ മാക്സ് മോഡലിൽ വൻ അപ്‌ഗ്രേഡുകളാണ് ആപ്പിൾ ഒരുക്കുന്നതെന്നാണ് സൂചനകൾ. ഫോണിന്റെ ഡിസൈനിൽ വലിയ മാറ്റങ്ങൾ വരുത്തുന്നതിന് പകരം പെർഫോമൻസിനും കാര്യക്ഷമതയ്ക്കും മുൻഗണന നൽകിക്കൊണ്ടായിരിക്കും പുതിയ മോഡൽ എത്തുകയെന്നാണ് റിപ്പോർട്ടുകൾ.

ഫേസ് ഐഡി സിസ്റ്റം പൂർണ്ണമായും സ്ക്രീനിനടിയിലാക്കുമെന്ന് നേരത്തെ റിപ്പോർട്ടുകളുണ്ടായിരുന്നെങ്കിലും, പുതിയ ലീക്കുകൾ പ്രകാരം ഫേസ് ഐഡിയുടെ ഒരു ഘടകം മാത്രമായിരിക്കും 18പ്രോയിലെ ഡിസ്‌പ്ലേയ്ക്കടിയിലേക്ക് മാറ്റുക. ഇതിലൂടെ നിലവിലെ ഐഫോൺ 17 പ്രോ മാക്സിനേക്കാൾ ചെറിയ രൂപത്തിലായിരിക്കും ഡൈനാമിക് ഐലൻഡ് ഉണ്ടാവുക. എന്നാല്‍ ഡിസ്‌പ്ലേ വലുപ്പത്തിൽ മാറ്റമുണ്ടാകില്ല; പ്രോ മാക്സിന് 6.9 ഇഞ്ചും പ്രോ മോഡലിന് 6.3 ഇഞ്ചും ഡിസ്‌പ്ലേ തന്നെയായിരിക്കും. എന്നാൽ, ബാറ്ററി ലൈഫ് വർദ്ധിപ്പിക്കാൻ സഹായിക്കുന്ന പുതിയ LTPO+ ഡിസ്‌പ്ലേ സാങ്കേതികവിദ്യ ഇതിൽ ഉൾപ്പെടുത്തിയേക്കും.

ബാറ്ററി ലൈഫ് തന്നെയായിരിക്കും ഐഫോൺ 18 പ്രോ മാക്സിന്റെ പ്രധാന ആകർഷണം. കൂടുതൽ വലിയ ബാറ്ററി ഉൾപ്പെടുത്തുന്നതിനായി ഫോണിന്റെ കട്ടി അല്പം കൂട്ടിയേക്കുമെന്നാണ് വിവരം. ഐഫോൺ 17 പ്രോ മാക്സിലെ 4,823എംഎഎച്ച് ബാറ്ററിയേക്കാൾ വലുപ്പമുള്ള, 5,100എംഎഎച്ച് ബാറ്ററിയായിരിക്കും പുതിയ ഫോണിൽ ഉണ്ടാകുക. ഇത് ഐഫോണിന്റെ ചരിത്രത്തിലെ ഏറ്റവും വലിയ ബാറ്ററിയായിരിക്കും. പെർഫോമൻസിന്റെ കാര്യത്തിൽ 2nm പ്രൊസസ്സിൽ നിർമ്മിച്ച ആപ്പിളിന്റെ അടുത്ത തലമുറ A20 പ്രോ ചിപ്‌സെറ്റ് ആയിരിക്കും ഇതിലുണ്ടാകുക. ഇത് ഫോണിന് മികച്ച വേഗതയും മികച്ച താപനിയന്ത്രണവും നൽകും.

ഡിസൈനിൽ വലിയ മാറ്റങ്ങൾ ഉണ്ടാകില്ലെങ്കിലും, റിയർ സെറാമിക് ഷീൽഡ് ഫിനിഷിൽ ചെറിയ മാറ്റങ്ങൾ വരുത്തിയേക്കും. കോസ്മിക് ഓറഞ്ച്, ഡീപ് ബ്ലൂ എന്നീ നിറങ്ങൾക്ക് പകരം ‘ഡാർക്ക് ചെറി’ എന്ന പുതിയ സിഗ്നേച്ചർ നിറത്തിലായിരിക്കും ഫോൺ പ്രധാനമായും എത്തുക.