ആലപ്പുഴ: ഗാർഹിക ആവശ്യത്തിനുള്ള പാചകവാതകം വാണിജ്യ സിലിണ്ടറുകളിലേക്ക് മാറ്റി തട്ടിപ്പ് നടത്തിയെന്ന കേസിൽ 54 സിലിണ്ടറുകൾ പൊലീസ് പിടികൂടി. പത്തിയൂർ എരുവ മണ്ണാഞ്ചി സുരേഷിന്റെ വീട്ടിൽ നിന്നാണ് കരീലക്കുളങ്ങര പൊലീസ് സിലിണ്ടറുകൾ പിടിച്ചെടുത്തത്. സുരേഷിനെ പൊലീസ് കസ്റ്റഡിയിലെടുത്തു. പുതിയിടത്തിന് സമീപത്തെ ഗ്യാസ് ഏജൻസിയിലെ ഡ്രൈവറാണ് സുരേഷ്. ഏജൻസിയിൽ നിന്ന് വീടുകളിലേക്ക് ഗ്യാസ് സിലിണ്ടറുകൾ എത്തിക്കുന്ന ജോലിയാണ് ഇയാൾ ചെയ്തിരുന്നത്.

വീടുകളിൽ വിതരണം ചെയ്യേണ്ട സിലിണ്ടറുകളിൽ നിന്ന് രണ്ടും മൂന്നും കിലോ വരെ ഗ്യാസ് വാണിജ്യ സിലിണ്ടറുകളിലേക്ക് മാറ്റിയിരുന്നതായാണ് പൊലീസിന്റെ കണ്ടെത്തൽ. വീട്ടിൽ വച്ചാണ് ഗ്യാസ് ഒരു സിലിണ്ടറിൽ നിന്ന് മറ്റൊന്നിലേക്ക് മാറ്റിയിരുന്നത്. ഗ്യാസ് മാറ്റാൻ ഉപയോഗിച്ച പൈപ്പുകളും വീട്ടിൽ നിന്ന് പൊലീസ് കണ്ടെടുത്തു. ബിപിസിഎൽ, ഐഒസി എന്നീ കമ്പനികളുടെ സീലുള്ള സിലിണ്ടറുകളാണ് പിടിച്ചെടുത്തത്.

തൃക്കുന്നപ്പുഴ സിഐ ശ്രീകുമാറിന്റെയും എസ്ഐ ബക്കർഷെരീഫിന്റെയും നേതൃത്വത്തിലായിരുന്നു പരിശോധന. പിടിച്ചെടുത്ത സിലിണ്ടറുകൾ പൊലീസ് സ്റ്റേഷനിലേക്ക് മാറ്റി. സംഭവത്തിൽ കൂടുതൽ അന്വേഷണം നടക്കുകയാണ്.