ന്യൂഡൽഹി: ഉത്സവകാലത്ത് വ്യാപാരത്തിലും ഡിജിറ്റൽ പേയ്‌മെന്റുകളിലും തടസ്സങ്ങൾ ഒഴിവാക്കാൻ തിരഞ്ഞെടുത്ത യുപിഐ ഇടപാടുകൾക്ക് എംഡിആർ ഏർപ്പെടുത്തുന്നത് ദീപാവലിക്ക് ശേഷത്തേക്ക് മാറ്റിവെച്ച് എൻപിസിഐ. ഒക്ടോബർ 15 മുതൽ നിരക്ക് പ്രാബല്യത്തിൽ വരുമെന്നായിരുന്നു നേരത്തെയുള്ള അറിയിപ്പ്. പുതുക്കിയ തീയതി പിന്നീട് പ്രഖ്യാപിക്കുമെന്ന് ഒക്ടോബർ 13-ന് പുറത്തിറക്കിയ പ്രസ്താവനയിൽ എൻപിസിഐ വ്യക്തമാക്കി.
വ്യാപാരി സംഘടനകൾ, ഫിൻടെക് സ്ഥാപനങ്ങൾ, പേയ്‌മെന്റ് കമ്പനികൾ എന്നിവയുടെ അഭ്യർത്ഥനകൾ പരിഗണിച്ചാണ് തീരുമാനം. ഉത്സവകാലത്തെ വ്യാപാരത്തെ പുതിയ നിരക്കുകൾ ബാധിക്കുമെന്ന ആശങ്കകൾ ഉയർന്നതോടെയാണ് നടപടി മാറ്റിവെച്ചത്.
2,000 രൂപയ്ക്ക് മുകളിലുള്ള തിരഞ്ഞെടുത്ത പേഴ്സൺ-ടു-മർച്ചന്റ് (P2M) യുപിഐ ഇടപാടുകൾക്ക് 0.4 ശതമാനം നിരക്കിൽ എംഡിആർ ഈടാക്കാനാണ് നിർദേശമെന്നാണ് റിപ്പോർട്ടുകൾ. ഈ നിരക്ക് ബാധകമായാൽ 10,000 രൂപയുടെ ഇടപാടിന് 40 രൂപ ഫീസായി വരും.
ഡിജിറ്റൽ പേയ്‌മെന്റുകൾ സ്വീകരിക്കുന്നതിന് വ്യാപാരികൾ നൽകുന്ന ഫീസാണ് മർച്ചന്റ് ഡിസ്‌കൗണ്ട് റേറ്റ്. എന്നാൽ, ഏതെല്ലാം ഇടപാടുകൾക്ക് നിരക്ക് ബാധകമാകുമെന്നും വിവിധ വ്യാപാര വിഭാഗങ്ങൾക്ക് വ്യത്യസ്ത നിരക്കുകളുണ്ടാകുമോയെന്നും സംബന്ധിച്ച് കൂടുതൽ വ്യക്തത ലഭിക്കേണ്ടതുണ്ട്.
ദീപാവലി ഉൾപ്പെടെയുള്ള ഉത്സവകാലം ചില്ലറ വ്യാപാരികൾക്കും ഓൺലൈൻ വിൽപ്പനക്കാർക്കും നിർണായകമാണ്. ഷോപ്പിങ്, ഇലക്ട്രോണിക്സ് ഉൽപ്പന്നങ്ങൾ, യാത്ര തുടങ്ങിയ മേഖലകളിൽ ഈ കാലയളവിൽ ഇടപാടുകൾ വർധിക്കാറുണ്ട്. പുതിയ ഫീസ് സംവിധാനം ഉടൻ നടപ്പിലാക്കുന്നത് വ്യാപാരച്ചെലവുകളെ ബാധിക്കുമെന്ന ആശങ്കയും മേഖലയിലുണ്ടായിരുന്നു.
നടപടി 2027 ജനുവരി വരെ നീട്ടിവെക്കുന്നത് പരിഗണിക്കുന്നതായി നേരത്തേ റിപ്പോർട്ടുകൾ പുറത്തുവന്നിരുന്നെങ്കിലും, നിലവിൽ ദീപാവലിക്ക് ശേഷമാണ് എംഡിആർ നടപ്പിലാക്കുകയെന്നാണ് എൻപിസിഐ അറിയിച്ചിരിക്കുന്നത്.
ഒക്ടോബർ 13-ലെ അറിയിപ്പിൽ എംഡിആർ പ്രാബല്യത്തിൽ വരുന്ന കൃത്യമായ തീയതിയോ പരിധിയിൽ ഉൾപ്പെടുന്ന ഇടപാടുകളുടെ പൂർണ വിവരങ്ങളോ എൻപിസിഐ വ്യക്തമാക്കിയിട്ടില്ല. ഔദ്യോഗിക പ്രഖ്യാപനം വരുന്നതോടെ നിരക്കുകളുടെ പ്രാബല്യവും ബാധകമായ ഇടപാടുകളും സംബന്ധിച്ച് കൂടുതൽ വ്യക്തത ലഭിക്കുമെന്നാണ് പ്രതീക്ഷ.
