തിരുവനന്തപുരം: കുത്തിവയ്പ്പുമായി ബന്ധപ്പെട്ട ചികിത്സാ പിഴവുകളിൽ നഴ്സുമാർക്കെതിരെ വിമർശനവുമായി ആരോഗ്യമന്ത്രി കെ. മുരളീധരൻ. ഇത്തരം പിഴവുകൾ വരുത്തുന്ന നഴ്സുമാർ മറ്റ് സംസ്ഥാനങ്ങളിൽ നിന്നുള്ളവരാണെന്നും അവിടങ്ങളിൽ കേരളത്തിലേതുപോലെയുള്ള പഠനരീതിയല്ലെന്നും മന്ത്രി പറഞ്ഞു. സംസ്ഥാനത്ത് കൂടുതൽ നഴ്സിങ് സീറ്റുകൾ അനുവദിക്കുമെന്ന് മുഖ്യമന്ത്രി ഉറപ്പുനൽകിയതായും നിലവിലെ 100 സീറ്റുകൾ 200 ആയി ഉയർത്തുമെന്നും മന്ത്രി അറിയിച്ചു.

കേരള മെഡിക്കൽ സർവീസസ് കോർപറേഷനിലെ (കെഎംഎസ്‌സിഎൽ) ഉദ്യോഗസ്ഥർ തന്റെ അടുത്തേക്ക് വരാത്തതിനെക്കുറിച്ചും മന്ത്രി പ്രതികരിച്ചു. മരുന്ന് കമ്പനികളുടെ പ്രതിനിധികളെ തന്റെ അടുത്തേക്ക് കൊണ്ടുവരരുതെന്ന് കർശന നിർദേശം നൽകിയിട്ടുണ്ട്. മരുന്നുകളുടെ ഗുണനിലവാരം പരിശോധിക്കേണ്ടത് ഉദ്യോഗസ്ഥരുടെ ഉത്തരവാദിത്തമാണ്. അതിന്റെ ഉത്തരവാദിത്തം ഏറ്റെടുക്കേണ്ടിവരുമെന്നതിനാലാണ് ഉദ്യോഗസ്ഥർ എത്താത്തതെന്നും അദ്ദേഹം ആരോപിച്ചു.

എസ്എംഎ മരുന്ന് വിവാദത്തിലും പ്രതിപക്ഷ നേതാവിനെതിരെ മന്ത്രി വിമർശനമുന്നയിച്ചു. പ്രതിപക്ഷ നേതാവ് മുഖ്യമന്ത്രിക്ക് അയച്ച കത്തിൽ ആശങ്കയല്ല പ്രകടിപ്പിച്ചതെന്നും വിലകൂടിയ മരുന്ന് നൽകണമെന്നാണ് ആവശ്യപ്പെട്ടതെന്നും മുരളീധരൻ പറഞ്ഞു. എല്ലാവർക്കും പിണറായി വിജയനെപ്പോലെ അമേരിക്കയിൽ പോയി ചികിത്സ നടത്താൻ കഴിയുമോയെന്നും അദ്ദേഹം പരിഹസിച്ചു.

അതേസമയം, യുഡിഎഫിൽ പ്രശ്നങ്ങളില്ലെന്നും മന്ത്രിസഭ ഒറ്റക്കെട്ടായാണ് പ്രവർത്തിക്കുന്നതെന്നും മന്ത്രി വ്യക്തമാക്കി. തന്റെ വകുപ്പുമായി ബന്ധപ്പെട്ട വിഷയങ്ങളിൽ മുഖ്യമന്ത്രി തന്നോട് ആലോചിക്കാറുണ്ട്. അതാത് വകുപ്പ് മന്ത്രിമാരുമായി ചർച്ച ചെയ്താണ് മുഖ്യമന്ത്രി തീരുമാനങ്ങളെടുക്കുന്നത്. വൈദ്യുതി കരാറുമായി ബന്ധപ്പെട്ട വിഷയത്തിൽ നിലവിൽ വൈദ്യുതിയുടെ ആവശ്യമില്ലെന്ന നിലപാടാണ് മുഖ്യമന്ത്രി അറിയിച്ചതെന്നും ഭാവിയിൽ ആവശ്യമായി വന്നേക്കാമെന്നും അദ്ദേഹം പറഞ്ഞു.

പ്രധാനപ്പെട്ട എല്ലാ വിഷയങ്ങളും മന്ത്രിസഭയിൽ ചർച്ച ചെയ്യാറുണ്ട്. അടൂർ പ്രകാശ് പാർട്ടിയുടെ അച്ചടക്കം ലംഘിച്ചിട്ടില്ലെന്നും മുന്നണിയിൽ ചർച്ചകളും കൂടിയാലോചനകളും നടക്കുന്നുണ്ടെന്നും മന്ത്രി കൂട്ടിച്ചേർത്തു.

ഡിവൈഎഫ്ഐക്കെതിരെയും മന്ത്രി വിമർശനമുന്നയിച്ചു. എവിടെയെങ്കിലും മരണം സംഭവിച്ചിട്ടുണ്ടോയെന്ന് അന്വേഷിച്ച് നടക്കുകയാണ് സംഘടനയെന്നും ചികിത്സാപ്പിഴവുണ്ടോയെന്ന് ഭൂതക്കണ്ണാടി വെച്ച് പരിശോധിക്കുകയാണെന്നും അദ്ദേഹം പരിഹസിച്ചു.

ചാനലുകളിലെ ബ്രേക്കിങ് ന്യൂസുകൾ കണ്ട് സർക്കാർ നടപടിയെടുക്കില്ലെന്നും തെറ്റ് ചെയ്തവരെ സംരക്ഷിക്കില്ലെന്നും മന്ത്രി വ്യക്തമാക്കി. തെറ്റ് ചെയ്യാത്തവർക്ക് സർക്കാരിന്റെ സംരക്ഷണമുണ്ടാകുമെന്നും കെ. മുരളീധരൻ പറഞ്ഞു.