കൊച്ചി: അരിയിൽ ഷുക്കൂർ വധക്കേസ് വിധിയിൽ പ്രതികരണവുമായി സ്പീക്കർ തിരുവഞ്ചൂർ രാധാകൃഷ്ണനും മുസ്ലിം ലീഗ് സംസ്ഥാന ജനറൽ സെക്രട്ടറി പി.എം.എ. സലാമും. കേസിൽ കോടതി നടത്തിയ കണ്ടെത്തലുകളിൽ അഭിപ്രായവ്യത്യാസമുണ്ടെങ്കിൽ സർക്കാരിന് അപ്പീൽ നൽകാമെന്നും ഇക്കാര്യത്തിൽ പ്രോസിക്യൂഷനാണ് തീരുമാനമെടുക്കേണ്ടതെന്നും തിരുവഞ്ചൂർ രാധാകൃഷ്ണൻ പ്രതികരിച്ചു. സർക്കാർ തീരുമാനം വരുന്നതുവരെ കാത്തിരിക്കണമെന്നും അദ്ദേഹം പറഞ്ഞു.
അതേസമയം, കേസിൽ അപ്പീൽ നൽകേണ്ടിവരുമെന്നാണ് പി.എം.എ. സലാമിന്റെ പ്രതികരണം. സിപിഎം നേതാക്കൾ കുറ്റക്കാരല്ലെന്ന് കോടതി വിധിച്ചിട്ടില്ലെന്നും ഇവർക്കെതിരായ തെളിവുകൾ കോടതിയിൽ ഹാജരിക്കുന്നതിൽ പ്രോസിക്യൂഷൻ പരാജയപ്പെട്ടതാണെന്നും അദ്ദേഹം ആരോപിച്ചു.
13 പ്രതികളെ കോടതി കുറ്റക്കാരായി കണ്ടെത്തിയിട്ടുണ്ട്. കോടതിവിധിയെ ചോദ്യം ചെയ്ത് നീങ്ങുന്നതിനേക്കാൾ നിയമപരമായ മാർഗങ്ങളിലൂടെ അപ്പീൽ നൽകുകയാണ് വേണ്ടതെന്ന് തിരുവഞ്ചൂർ പറഞ്ഞു. വിധിപ്പകർപ്പ് ലഭിച്ചാൽ മാത്രമേ അന്വേഷണത്തിൽ വീഴ്ചകളുണ്ടായിട്ടുണ്ടോ എന്ന് പരിശോധിക്കാൻ കഴിയൂ. ഗൂഢാലോചന പൂർണമായി തെളിയിക്കാൻ സാധിച്ചില്ലെന്നാണ് കോടതി കണ്ടെത്തിയതെന്നും അദ്ദേഹം വ്യക്തമാക്കി.
അതേസമയം, സാക്ഷികൾക്ക് നേരെ ഭീഷണിയുണ്ടായിരുന്നുവെന്നും ആദ്യഘട്ട അന്വേഷണം കുറ്റമറ്റതായിരുന്നില്ലെന്നും പി.എം.എ. സലാം ആരോപിച്ചു. ഇതേത്തുടർന്നാണ് സിബിഐ അന്വേഷണം ആവശ്യപ്പെട്ട് കോടതിയെ സമീപിച്ചതെന്നും അദ്ദേഹം പറഞ്ഞു. രാഷ്ട്രീയ കൊലപാതകങ്ങൾ ആവർത്തിക്കരുതെന്നും കേസിൽ അപ്പീൽ നൽകേണ്ടതുണ്ടെന്നും സലാം കൂട്ടിച്ചേർത്തു.
അരിയിൽ ഷുക്കൂർ വധക്കേസിൽ 13 പ്രതികളെയാണ് കൊച്ചിയിലെ സിബിഐ കോടതി കുറ്റക്കാരായി കണ്ടെത്തിയത്. പി. ജയരാജൻ, ടി.വി. രാജേഷ് എന്നിവരടക്കം 18 പ്രതികളെ കോടതി വെറുതെ വിട്ടു. ഒന്നാം പ്രതി കെ.വി. സുമേഷ്, മൂന്നാം പ്രതി അനൂപ് എന്നിവരടക്കം 13 പേരാണ് കുറ്റക്കാരായത്. ഇതിൽ ഏഴ് പ്രതികൾക്കെതിരെ കൊലക്കുറ്റവും തെളിഞ്ഞിട്ടുണ്ട്.
2012 ഫെബ്രുവരി 12നാണ് തളിപ്പറമ്പിലെ ചുള്ളിയോട് വയലിൽവെച്ച് 23കാരനായ അരിയിൽ ഷുക്കൂർ കൊല്ലപ്പെട്ടത്. കേസിൽ കുറ്റക്കാരെന്ന് കണ്ടെത്തിയ പ്രതികൾക്കുള്ള ശിക്ഷ ഇന്ന് ഉച്ചകഴിഞ്ഞ് മൂന്ന് മണിക്ക് പ്രഖ്യാപിക്കും.


