ന്യൂഡല്ഹി: മദ്യനയക്കേസുമായി ബന്ധപ്പെട്ട ഹൈക്കോടതിയുടെ ഉത്തരവിനെതിരെ സുപ്രീംകോടതിയെ സമീപിക്കാനൊരുങ്ങി ഡല്ഹി മുഖ്യമന്ത്രി അരവിന്ദ് കെജ്രിവാള്. ഇ.ഡിയുടെ അറസ്റ്റിനെ ചോദ്യംചെയ്ത് കെജ്രിവാള് സമര്പ്പിച്ച ഹര്ജി ഡല്ഹി ഹൈക്കോടതി ഇന്ന് തള്ളിയിരുന്നു. ഇതിനുപിന്നാലെയാണ് സുപ്രീംകോടതിയെ സമീപിക്കാന് തീരുമാനിച്ചതെന്ന് കെജ്രിവാളുമായി ബന്ധപ്പെട്ട വൃത്തങ്ങള് അറിയിച്ചു.
ഹൈക്കോടതിയുടെ ഉത്തരവിനെ അംഗീകരിക്കുന്നില്ലെന്ന് ആംആദ്മി പാര്ട്ടി നേതാക്കളും വ്യക്തമാക്കി. ‘ഹൈക്കോടതിയെ ബഹുമാനിക്കുകയും അംഗീകരിക്കുകയും ചെയ്യുന്നു. എന്നാല് ഇന്ന് കെജ്രിവാളിന്റെ ഹര്ജി തള്ളാന് കോടതി എടുത്ത തീരുമാനത്തെ ഞങ്ങള് അംഗീകരിക്കുന്നില്ല. സുപ്രീംകോടതിയില് പോകാനാണ് തീരുമാനം’ – ആംആദ്മി പാര്ട്ടി നേതാവ് സൗരഭ് ഭരദ്വാജ് മാധ്യമങ്ങളോട് പറഞ്ഞു.
അതേസമയം, ജാമ്യം അനുവദിക്കാനുള്ളതല്ല, അറസ്റ്റ് നിയമവിരുദ്ധമാണോ എന്ന് പരിശോധിക്കുന്നതിന് വേണ്ടിയാണ് നിലവില് സമര്പ്പിക്കപ്പെട്ട ഹര്ജി എന്ന് കോടതി വ്യക്തമാക്കി. ജസ്റ്റിസ് സ്വര്ണകാന്ത ശര്മയുടെ സിംഗിള് ബെഞ്ചാണ് ഹര്ജിയില് വിധി പറഞ്ഞത്. കുറ്റകൃത്യത്തിലും ഗൂഢാലോചനയിലും കെജ്രിവാള് ഉള്പ്പെട്ടതായി വ്യക്തമാക്കുന്ന തെളിവുകള് ഇ.ഡി. ശേഖരിച്ചിട്ടുണ്ടെന്ന് കോടതി ചൂണ്ടിക്കാട്ടി.
മദ്യനയക്കേസില് മാര്ച്ച് 21-നാണ് കെജ്രിവാളിനെ ഇ.ഡി. അറസ്റ്റ് ചെയ്തത്. ഇതിനുപിന്നാലെ തന്റെ അറസ്റ്റും റിമാന്ഡും നിയമവിരുദ്ധമാണെന്ന കെജ്രിവാളിന്റ വാദം കോടതി തള്ളി. ഗോവ തിരഞ്ഞെടുപ്പിന് കെജ്രിവാളിന് പണം നല്കിയെന്ന് വ്യക്തമാക്കുന്ന മതിയായ തെളിവുകളും ആംആദ്മി പാര്ട്ടിയുടെ സ്വന്തം സ്ഥാനാര്ഥിയുടെ മൊഴിയും ഇ.ഡിക്ക് ഹാജരാക്കാന് കഴിഞ്ഞതായി കോടതി വ്യക്തമാക്കി. ഇത് ചൂണ്ടിക്കാട്ടിയാണ് ജസ്റ്റിസ് സ്വര്ണകാന്ത ശര്മ കെജ്രിവാളിന്റെ അറസ്റ്റും തുടര്ന്നുള്ള റിമാന്ഡും ശരിവെച്ചത്.
