അനീഷ എം എ: സബ് എഡിറ്റർ
ആലപ്പുഴ: കളര്കോട് കാറും ബസും കൂട്ടിയിടിച്ച് അഞ്ച് പേര് മരിച്ച സംഭവത്തില് ഇന്ക്വിസ്റ്റ് നടപടികള് പുരോഗമിക്കുന്നു. ഇന്നലെ രാത്രി ഒമ്പത് മണിയോടെയായിരുന്നു അപകടം. വിദ്യാര്ത്ഥികള് സിനിമയ്ക്ക് പോകും വഴിയാണ് കാറും കെഎസ്ആര്ടിസി ബസും കൂട്ടിയിടിച്ച് അപകടം ഉണ്ടായത്. ഇന്ന് 12 മണിയോടെ പോസ്റ്റ്മോര്ട്ടം നടപടികള് പൂര്ത്തിയാകും. ശേഷം വണ്ടാനം മെഡിക്കല് കോളേജില് മൃതദേഹങ്ങള് പൊതുദര്ശനത്തിന് വെക്കും.
ആലപ്പുഴ വണ്ടാനം മെഡിക്കല് കോളേജിലെ ഒന്നാം വര്ഷ എംബിബിഎസ് വിദ്യാര്ത്ഥികളാണ് മരിച്ചത്. മലപ്പുറം സ്വദേശി ദേവാനന്ദന്, ലക്ഷദ്വീപ് സ്വദേശി ഇബ്രാഹിം, ആലപ്പുഴ സ്വദേശി ആയുഷ് ഷാജി, പാലക്കാട് സ്വദേശി ശ്രീദീപ്, കണ്ണൂര് സ്വദേശി മുഹി അബ്ദുള് ജബ്ബാര് എന്നിവരാണ് മരിച്ചത്.
വിദ്യാര്ത്ഥികള് സഞ്ചരിച്ചിരുന്ന ടവേര കാര് പൂര്ണമായും തകര്ന്നു. മഴയില് തെന്നിനീങ്ങിയ കാര് എതിര്ദിശയില് നിന്ന് വരികയായിരുന്ന ബസിലേക്ക് ഇടിച്ചുകയറുകയായിരുന്നു. അരമണിക്കൂറോളം നീണ്ട പരിശ്രമത്തിനൊടുവിലാണ് ഇവരെ കാറില് നിന്നും പുറത്തെടുക്കാനായത്.
