കൊല്ക്കത്ത: ആര്ജികര് മെഡിക്കല് കോളജിലെ ബലാത്സംഗക്കൊലയിൽ കുറ്റക്കാരനെന്ന് കണ്ടെത്തിയ ഏകപ്രതി സഞ്ജയ് റോയിയുടെ ശിക്ഷാവിധി ഇന്ന്. വാദം കേട്ടതിനു ശേഷമാകും കൊല്ക്കത്ത സീല്ഡ അഡീഷണല് സെഷന്സ് കോടതി വിധി പറയുന്നത്. കൊലപാതകം, ബലാത്സംഗം, മരണകാരണമായ ആക്രമണം തുടങ്ങിയ കുറ്റങ്ങളിലെ ശിക്ഷാവിധിയിലാണ് വാദം. അതിക്രൂരവും അപൂര്വ്വങ്ങളില് അപൂര്വ്വവുമായ കുറ്റകൃത്യം നടത്തിയ പ്രതിയ്ക്ക് വധശിക്ഷ നല്കണമെന്ന് സിബിഐ വിചാരണക്കോടതിയില് ആവശ്യപ്പെടും.
2024 ഓഗസ്റ്റ് ഏഴിനായിരുന്നു രാജ്യത്തെ ഞെട്ടിച്ച ക്രൂരമായ ബലാത്സംഗ കൊലപാതകം. പിജി വിദ്യാര്ത്ഥിനിയായ 31കാരിയെ ആര്ജി കര് മെഡിക്കല് കോളജിലെ സെമിനാര് ഹാളില് കൊല്ലപ്പെട്ട നിലയില് കണ്ടെത്തുകയായിരുന്നു. പ്രാരംഭ അന്വേഷണത്തില് പശ്ചിമ ബംഗാള് പൊലീസ് പരാജയപ്പെട്ടുവെന്നായിരുന്നു ആക്ഷേപം. തുടര്ന്ന് കല്ക്കട്ട ഹൈക്കോടതി കേസിന്റെ അന്വേഷണം സിബിഐയെ ഏല്പ്പിക്കുകയും അന്വേഷണം പൂര്ത്തിയാക്കി കുറ്റപത്രം സമർപ്പിക്കുകയും ചെയ്തു. സംഭവശേഷം അഞ്ചര മാസം കഴിയുമ്പോഴാണ് കേസില് വിചാരണക്കോടതിയുടെ ശിക്ഷാവിധി.
