ബെംഗളൂരു: ബെംഗളൂരു-മൈസൂരു ദേശീയപാതയിലെ രാമനഗരയിൽ ഉണ്ടായ വാഹനാപകടത്തിൽ രണ്ട് മലയാളി യുവാക്കൾ മരിച്ചു. വയനാട് പുല്പള്ളി കബനിഗിരി സ്വദേശി ടി.വി. അജിത്ത്, കാസർകോട് അട്ടേങ്ങാനം കുറ്റിയോട്ട് സ്വദേശി സുബിൻ എന്നിവരാണ് മരിച്ചത്.
കാസർകോട്ടിൽ നിന്ന് ബെംഗളൂരുവിലേക്ക് ക്വാറിയിലേക്കുള്ള ഉപകരണങ്ങൾ വാങ്ങാൻ വരുന്നതിനിടെയാണ് അപകടം. ചൊവ്വാഴ്ച രാവിലെ ഏഴോടെ ഇവർ സഞ്ചരിച്ചിരുന്ന പിക്കപ്പ് വാൻ നിയന്ത്രണം വിട്ട് ഡിവൈഡറിൽ ഇടിക്കുകയായിരുന്നു.
അപകടത്തിന്റെ ആഘാതത്തിൽ വാഹനത്തിന്റെ മുൻഭാഗം പൂർണമായി തകർന്നു. അട്ടേങ്ങാനത്തെ പരേതനായ താമരാക്ഷന്റെയും ബീനയുടെയും മകനാണ് സുബിൻ. തുണ്ടത്തിൽ വീട്ടിൽ വാസുദേവൻ നായരുടെ മകനാണ് അജിത്ത്.
