മക്ക:മക്കയിൽ മെത്താംഫെറ്റാമിൻ എന്ന മാരക മയക്കുമരുന്ന് കടത്താൻ ശ്രമിച്ച അഫ്ഗാനിസ്താൻ സ്വദേശിയുടെ വധശിക്ഷ സൗദി അറേബ്യ നടപ്പിലാക്കി. അസീസുല്ല അമ്മാരി എന്നയാളുടെ ശിക്ഷയാണ് കഴിഞ്ഞ വ്യാഴാഴ്ച മക്കയിൽ വെച്ച് നടപ്പിലാക്കിയതെന്ന് സൗദി ആഭ്യന്തര മന്ത്രാലയം ഔദ്യോഗികമായി അറിയിച്ചു. അതീവ സുരക്ഷാ പരിശോധനകൾക്കിടെ മയക്കുമരുന്നുമായി സുരക്ഷാ ഉദ്യോഗസ്ഥർ ഇയാളെ പിടികൂടുകയായിരുന്നു. തുടർന്ന് നടന്ന വിശദമായ അന്വേഷണത്തിലും ചോദ്യം ചെയ്യലിലും ഇയാൾ കുറ്റം ചെയ്തതായി തെളിയുകയും, കേസ് സ്പെഷ്യലൈസ്ഡ് ക്രിമിനൽ കോടതിയുടെ പരിഗണനയ്ക്ക് വിടുകയും ചെയ്തു. മയക്കുമരുന്ന് കടത്ത് രാജ്യത്തിന്റെ സുരക്ഷയ്ക്കും ജനങ്ങളുടെ ആരോഗ്യത്തിനും ഭീഷണിയാണെന്ന് വിലയിരുത്തിയ കോടതി പ്രതിക്ക് വധശിക്ഷ വിധിക്കുകയായിരുന്നു.
സ്പെഷ്യലൈസ്ഡ് കോടതി പുറപ്പെടുവിച്ച ഈ വിധി പിന്നീട് അപ്പീൽ കോടതിയും സുപ്രീം കോടതിയും വിശദമായി പരിശോധിക്കുകയും ശരിവെക്കുകയും ചെയ്തു. നിയമപരമായ എല്ലാ നടപടിക്രമങ്ങളും പൂർത്തിയാക്കിയതിനെത്തുടർന്ന് വിധി നടപ്പിലാക്കാൻ ആവശ്യമായ രാജകീയ ഉത്തരവ് പുറപ്പെടുവിക്കുകയായിരുന്നു. മയക്കുമരുന്ന് മാഫിയകൾക്കെതിരെയും രാജ്യത്തേക്ക് ഇത്തരം നിരോധിത വസ്തുക്കൾ എത്തിക്കുന്നവർക്കെതിരെയും ശക്തമായ നടപടികളാണ് സൗദി ഭരണകൂടം സ്വീകരിച്ചു വരുന്നത്. മയക്കുമരുന്നിന്റെ വിപത്തിൽ നിന്ന് പൗരന്മാരെയും പ്രവാസികളെയും സംരക്ഷിക്കാനും സമൂഹത്തിൽ സുരക്ഷിതത്വം ഉറപ്പാക്കാനും സൗദി ഗവൺമെന്റ് പ്രതിജ്ഞാബദ്ധമാണെന്നും നിയമം ലംഘിക്കുന്നവർക്ക് കടുത്ത ശിക്ഷ തന്നെ നൽകുമെന്നും ആഭ്യന്തര മന്ത്രാലയം ഈ നടപടിയിലൂടെ ഒരിക്കൽ കൂടി വ്യക്തമാക്കി.
